"භල්ලුක-I" හි සංශෝධන අතර වෙනස්කම්

11:49, 29 ජනවාරි 2024 වන විට නවතම සංශෝධනය

දකුණු ඉන්දිය නායකයෙකි, රණ ශූරයෙකි. එළාර රජුගේ හමුදාවේ සේවය කළ දීඝජන්තු යෝධයාගේ බෑනැ කෙනෙකි. විජිතපුර සටනින් ද්‍රවිඩයන් පරාජය වීමෙන් අනතුරුව ද්‍රවිඩ සේනාවට ආධාර පිණිස ලංකාවට පැමිණෙන ලෙස ඉල්ලා සිටිමින් එළාර රජු භල්ලුකට හසුන් යැවී ය. එහෙත් බලසම්පන්න හමුදාවක් සමඟ ඔහු ලක්දිවට ගොඩබසින විට එළාර රජු ආදාහනය කර සත්දිනක් ගත වී තිබුණි.

මහතොටින් ගොඩබට භල්ලුක තෙමේ කොළධහාලක නම් ගමෙහි කඳවුරු බැඳගත්තේ ය. ඒ බව ඇසූ දුටුගැමුණු රජු මහත් සේනාවක් රැගෙන ඔහු හා සටන් පිණිස නික්මුණේ ය. භල්ලුක රජු ඉදිරියට පැමිණි විට දුටුගැමුණු රජුගේ හස්තියා වූ කඩොල් ඇතා ක්‍රමයෙන් පසුබසින්නට පටන් ගත්තේ ය. පසුබැස්ස ඇතා මහාවිහාර සීමාව තුළ සිටගත්තේ ය. එහි දී භල්ලුක හා දුටුගැමුණු රජු අතර සටන් ඇති විය. දුටුගැමුණු රජු කඩුවෙන් මුව වසාගෙන භල්ලුකට පරිභව කරද්දී භල්ලුක රජුගේ මුවට හීයක් විද්දේ ය. එම හීය කඩු තලයෙහි වැදී බිම වැටුණු බව නොදුටු භල්ලුක, රජුගේ මුවට හීයක් විද්දේ යයි ජයඝෝෂා පැවැත්වී ය. එවිට රජුට පිටිපසින් හුන් ඵුස්සදේව යෝධයා වහා ම භල්ලුකගේ මුවට හීයක් විද්දේ ය. එවිට ඔහු රජු දෙසට පා හෙලා වැටෙන බව දුටු ඵුස්සදේව ඔහුගේ දණහිසට තවත් හීයක් විද ඔහු රජු දෙසට හිස ලා වැටෙන්නට සැලැස්වී ය. භල්ලුක‍ගේ මරණින් පසු දුටුගැමුණු රජු ලක්දිව අසහාය නායකයා බවට පත්විය.

(කර්තෘ: දේවිකා ප්‍රියදර්ශනී එදිරිවීර: 1976)

(සංස්කරණය නොකළ)