"ටල්කා" හි සංශෝධන අතර වෙනස්කම්

15:05, 20 නොවැම්බර් 2024 වන විට නවතම සංශෝධනය

(Talca). මධ්‍යම චිලී දේශයේ උ.අ. 35 60’0” හා බ.දේ. 71 40’0”හි පිහිටි පළාතක් (commune) හා එහි ප්‍රධාන නගරය මෙනමින් හැඳින්වේ. ප්‍රදේශය වෙරළබඩ කඳුකර ය. මධ්‍යම නිම්නයේ සිට ඇන්ඩියන් කෝඩිලෙරා දක්වා පැතිර යයි. 1833 දී කොල්චගුවා (Colchagua) පළාතෙන් වෙන් කොට කියුරිකො (Curico) පළාත හා එක්කරන ලදි. ටල්කා ප්‍රදේශයේ භූමි ප්‍රමාණය ව.කිමී. 10,141කි. මෙම ප්‍රදේශය ජලවහනය වන්නේ රියෝ මැටාක්විටො (Rio mataquito) හා රියෝ මවුලේ (Rio maule) යන ගංගාවන්ගෙනි.

කෘෂිකර්මය පදනම් කරගත් අර්ථක්‍රමයක් පවතින මෙම ප්‍රදේශයේ ජනයාගෙන් වැඩි කොටසක් ජීවත් වන්නේ ග්‍රාමීය ප්‍රදේශවල ය. විශේෂයෙන් ම ගංගා නිම්නවල ය. මිදි, තිරිඟු හා වී වගාව ද සත්ත්ව පාලනය ද ප්‍රධාන ආර්ථික කටයුතු වේ. චිලී රටේ ප්‍රධාන ම වයින් නිපදවන්නා වනුයේ ටල්කා ප්‍රදේශයයි. ප්‍රදේශයේ ජනගහනය 203,873 (2017) කි.

නගරය

මුල දී සැන් අගුස්තන් ඩි ටල්කා (San Agustin De Talca) යන නමින් හඳුන්වනු ලැබූ ව.කිමී. 232ක පමණ භූමි ප්‍රදේශයකින් යුත් මෙම නගරය මධ්‍යම නිම්නයේ රියෝ මවුලේ ගංගාව අසල පිහිටියේ ය. ටල්කා පළාතේ (Talca Province) සහ මෝලේ ප්‍රදේශයේ (Maule Region) අගනුවර මෙයයි. 1692 දී ගොඩනංවනු ලැබූ ටල්කා නගරය 1742 හා 1928 ඇති වූ භූමි කම්පාවන්ගෙන් විනාශයට පත් වූයෙන් නැවතත් සම්පූර්ණයෙන් ම අලුතින් ගොඩනංවන ලදි.

මෙය කෘෂිකාර්මික මෙන් ම කාර්මික නිෂ්පාදනවලින් යුත් ප්‍රධාන ආර්ථික මධ්‍යස්ථානයකි. වයින් නිපදවන ප්‍රදේශය මධ්‍යයේ පිහිටි ටල්කා නගරය චිලී දේශයේ ප්‍රධාන ම ගිනිපෙට්ටි නිෂ්පාදන මධ්‍යස්ථානය ද වේ. එමෙන් ම සපත්තු, විස්කෝතු, චොක්ලට් හා නූඩ්ල්ස් නිපදවීමේ කර්මාන්තශාලා ද මෙහි පිහිටා ඇත.

දුම්රිය හා මහාමාර්ග මංසන්ධියක් වන ටල්කා සිට ඇන්ඩීස් කඳුකරය හරහා ආජන්ටිනාවට මහා මාර්ගයක් වැටී තිබේ. ටල්කාවේ ඉදිකොට ඇති කතෝලික පල්ලිය චිලී ඉතිහාසයේ ප්‍රමුඛ කාර්යභාරයක් ඉටුකොට තිබේ. මෙහි ජනගහනය 189,505 (2002)කි.

(කර්තෘ: දේවිකා ප්‍රියදර්ශනී එදිරිවීර)

(සංස්කරණය: 2019)