"අසුර-2" හි සංශෝධන අතර වෙනස්කම්

10:22, 3 දෙසැම්බර් 2024 වන විට නවතම සංශෝධනය

මෙනමින් හැඳින්වෙන ගෝත්‍රයක මිනිස්සු දැනට ඉන්දියාවේ බෙංගාලයට අයත් ‍ඡෝටානාග්පූර්හි ජීවත් වෙති. මොවුන් අයත් වන්නේ අනාර්‍ය්‍ය ගෝත්‍රයක් වූ කොලරි වර්ගයටය. දැනට ඡෝටානාග්පූර්හි ජීවත් වන අසුර ගෝත්‍රිකයන් අතීතයේ ආර්යයන් ඉන්දියාව ආක්‍රමණය කළ අවස්ථාවේ දී ඔවුන්ට විරුද්ධව නැඟී සිටි ස්වදේශික ගෝත්‍රයකින් පැවත එන්නන් යයි සැක කළ හැකි බව මානව විද්‍යාඥයන්ගේ මතයයි. දැනට ඉන්දියාවේ ජීවත්වන අසුර ගෝත්‍රිකයන්ගේ සංඛ්‍යාව ඉතා සුළු නමුත් මොවුහු සිය වංශචිහ්නයන්ට අනුව කොටස් කිහිපයකට බෙදී සිටිති. බාස්රියාර් නමින් හැඳින්වෙන කොටසේ චිහ්නය උණ ගසකි. මක්රාර්, ඉන්ද් හා හේරෝ යන කොටස්වලට ක්‍රමයෙන් මකුළුවා, ආඳා හා ඉදිබුවා යන වංශචිහ්න අයත් වේ.

අසුර ගෝත්‍රිකයන්ගෙන් සමහරුන් රක්ෂාව වශයෙන් කරන්නේ ගොවිතැනය. තවත් කොටසක් ලෝහ කර්මාන්තයෙන් ජීවිකාව කර ගනිති. ඇතැම්හු අහිගුණ්ඨිකයන් වශයෙන් හැසිරෙමින් සිඟාකෑමෙන් ජීවත්වෙති.

අසුර ගෝත්‍රිකයන් අතර බහුභාර්යයාසේවනය හා වැන්දඹු විවාහ බහුලව සිදුවෙයි. ඔවුන්ගේ ආගම වනුයේ භූතයන් හා මළගියවුන් පිදීමයි. මෙම ගෝත්‍රිකයන්ගේ භාෂාව හැඳින්වෙනුයේ දුක්ම නමිනි. එය මුණ්ඩාරි භාෂාව ආශ්‍රයෙන් ඇති වූ භාෂාවකැයි සිතිය හැකිය.

(කර්තෘ: ඇස්.ඩබ්ලිව්. ඈපා සෙනෙවිරත්න)

(සංස්කරණය: 1965)