"උලකුඩය දේවී" හි සංශෝධන අතර වෙනස්කම්

14:59, 9 නොවැම්බර් 2016 වන විට නවතම සංශෝධනය

කෝට්ටේ රජ කළ හවැනි පැරකුම්බා (බ.) රජුගේ දියණියයි. ලෝකනාථා යනු ද ඇය හැඳින්වීමට භාවිත වූ නාමයකි. සැලලිහිණි සංදේශය ශ්‍රී රාහුල හිමියන් විසින් රචනා කරන ලද්දේ උලකුඩය දේවියහට යහපත් පුත් කුමරකු ලබා දෙන ලෙස විභීෂණ දෙවියන් අයැදීම සඳහාය. රාහුල හිමියන් පරෙවි සංදේශය රචනා කෙළේ උලකුඩය දේවියගේ දෙටු සොහොයුරිය වූ චන්ද්‍රවතී කුමරියහට සුදුසු කුමරකු සැමියකු ලෙස ලබාදෙන ලෙස උපුල්වන් (බ.) දෙවියන් යැදීමටය. මෑතක් වනතුරුම පිළිගැනුණේ, හවැනි පැරකුම්බා රජුට චන්ද්‍රවතී හා උලකුඩය දේවී නමින් දියණියන් දෙදෙනකු සිටි බවයි. එහෙත් මෑතක දී පැරණි "පරම්පරා පුස්තකය" නමැති ඓතිහාසික ග්‍රන්ථයකින් උපුටා ගන්නා ලද කරුණු සෙල්ලිපිවල කොටා තිබී තමා කියවූ බව කියන මහාචාර්ය පරණවිතාන මහතාගේ මතය අනුව නම් හවැනි පැරකුම්බාවන්ට සිටියේ එක් දියණියක පමණි. එක් සෙල්ලිපි පාඨයකින් උලකුඩය දේවි යනු චන්ද්‍රවතී කුමරියගේ අභිෂේක නාමය බව හෙළි වෙතැයි ඔහු පවසයි. මේ අනුව නම් චන්ද්‍රවතී, උලකුඩය දේවි යනු දෙදෙනකු නොව එක් කුමරියක විය යුතුය. හවැනි පැරකුම්බා රජු ගැන සඳහන් කරන පෘතුගීසි ඉතිහාසඥයකු වූ ඩි කූටෝ ද මේ රජුට පුතුන් නොසිටි බවත් එක් දියණියක පමණක් සිටි බවත් සඳහන් කරයි.

උලකුඩය දේවියගේ මව පිළිබඳව සාහිත්‍ය කෘතියක සඳහන් නොවේ. හවැනි පැරකුම්බාවන්ගේ අගමෙහෙසිය කීරවැල්ලේ කුමරියක බව රාජාවලියෙහි දක්වා ඇතත් ඇය උලකුඩය දේවියගේ මව දැයි යනු අවිනිශ්චිතය. සෙල්ලිපිවල සඳහන් පරිදි නම්, හවැනි පැරකුම්බාවන්ගේ අග මෙහෙසිය ස්වර්ණමාණික්‍යා (රන්මැණිකා) වූ අතර ඇගේ දියණිය උලකුඩය දේවිය වූවාය.

උලකුඩය දේවිය පාවා දෙන ලද්දේ චෝල කුමරකුහට යැයි ඩි කූටෝ දක්වතත් පරණවිතාන මහතා කියවූ සෙල්ලිපිවල දැක්වෙනුයේ අම්බලන්තොට රජ කළ සුන්දර පාණ්ඩ්‍යගේ පුත්‍ර සුන්දර පාණ්ඩ්‍ය කුමරහට උලකුඩය දේවිය පාවා දුන් බවයි. අම්බලන්තොට රජ කළ සුන්දර පාණ්ඩ්‍ය හවැනි පැරකුම්බාවන් යටතේ සිටි මාණ්ඩලික රාජයෙකි. මෙම විවාහයෙන් පසුව රජු විසින් සුන්දර පාණ්ඩ්‍ය කුමරාහට අගමැති තනතුර ද එම තනතුරට අයත් නල්මුරුතුණ මිණි සන්නස් නම් ගෞරව පදය ද ඔහුට පිරිනමන ලද බව දැක්වේ. සැලලිහිණි සංදේශයෙහි ලෝකනාථාවගේ සැමියා ලෙස දක්වා තිබෙනුයේ නන්නුරුතුනෙයියාර්ය. මොහු "පුරාණ නාමාවලිය" රචනා කළ නන්නුරුතුනෙයියාර් නොවේය යනු පරණවිතාන මහතාගේ අදහසයි.

ශ්‍රී රාහුල හිමියන් කාව්‍යශේඛරය රචනා කෙළේ උලකුඩය දේවියගේ ආරාධනයෙන් බව එහි පළමුවන සර්ගයේ 22 වැනි පද්‍යෙයන් හෙළි වේ. කාව්‍යශේඛරයෙහි මෙකුමරිය පිළිබඳව කෙරෙන වර්ණනාව විශිෂ්ට වූවකි. ඇය කාව්‍යශේඛර කාව්‍යය සතුටින් ඇසූ බව එහි 15 වන සර්ගයෙහි 23 වන පද්‍යයෙන් කියැවේ.

හවැනි පැරකුම්බාවන් ඇවෑමෙන් කෝට්ටේ රජ වූයේ මෙකුමරියගේ පුත්‍රයාය. II වැනි ජයබාහු නමැති ඔහු ජයවීර පරාක්‍රමබාහු (ක්‍රි. ව. 1467-1469) ලෙස ද හැඳින්වේ.