ගුවාතමාලා නගරය

මෙය ගුවාතමාලාවේ අගනගරය සහ විශාලතම නගරය ලෙස සැලකේ. මෙය දකුණු - මධ්‍යම ගුවාතමාලා සානුව ආශ්‍රිත ව පිහිටා ඇත. මුහුදු මට්ටමින් මීටර 1500 ක් පමණ උසක නගරය පිහිටා ඇත. ගුවාතමාලා නගරයේ ප්‍රධානතම මධ්‍යස්ථානය පවතින්නේ නගරයේ ඊසාන දිග කොටසෙහි ය. නවීන හෝටල්, සාප්පු සංකීර්ණ, කාර්යාල ගොඩනැගිලි ආදියෙන් මේ ප්‍රදේශය යුක්ත ය. ගුවාතමාලා රජයේ ජාතික මාලිගය නගර මධ්‍යයේ පිහිටා ඇත. නගර මධ්‍යයේ උතුරු කොටසෙහි මිනර්වා (Minerva) නමින් හඳුන්වන උද්‍යානය පිහිටා ඇත. මේ උද්‍යානය හෙක්ටයාර් 0.25 ක පමණ විශාලත්වයෙන් යුක්ත ය. නගරයේ දකුණු කොටසෙහි පිහිටි අයුරෝරා උද්‍යානයේ (Aurora Park) කෞතුකාගාර කිහිපයක් ද සත්තු වත්තක් ද අශ්ව රේස් පිට්ටනියක් ද පිහිටුවා ඇත. ගුවාතමාලාවේ අන්තර්ජාතික ගුවන් තොටුපොළ වෙන අයුරෝරා මේ උද්‍යානයේ නැගෙනහිර දෙස පිහිටා ඇත. ගුවාතමාලා නගරයේ විශ්ව විද්‍යාල හතරක් ඇත. ක්‍රි.ව. 1600 ගණන්වල දී ආරම්භ කරන ලද සැන් කාර්ලෝස් (San Carlos) විශ්ව විද්‍යාලය ද එයින් එකකි. ගුවාතමාලා නගරය සීඝ්‍රෙයන් දියුණුවට පත් වෙමින් පවතියි. 1981 දී කරනු ලැබූ සංගණනයට අනුව නගරයේ ජන සංඛ්‍යාව 7,54,275 ක් විය. නමුත් මේ ප්‍රමාණය 1990 වන විට කරන ලද ඇස්තමේන්තුවලට අනුව 15,00,000 කට වැඩි විය. මේ නිසා නගරය අධික ජනගහණ තදබදයෙන් පීඩා විඳින අතර දිළිඳු බව පිළිබඳ ගැටලුවට ද දැඩිලෙස මුහුණ දී සිටියි. දුප්පත් ජනයා ජීවත් වීමට නුසුදුසු ස්ථානවල ජීවත් වෙති.

ගුවාතමාලා නගරය රටේ ප්‍රධාන කාර්මික මධ්‍යස්ථානය වේ. බීම වර්ග නිෂ්පාදනය, ආහාර සැකසීම, රෙදිපිළි නිෂ්පාදනය, තොග වෙළඳාම ආදිය සම්බන්ධ කටයුතු ඉතා වැදගත් වේ. වෙළෙඳ කටයුතු සහ රජයේ ආයතනවල රැකියාවල යෙදෙන්නවුන් බහුල ව දැකිය හැකිය. මධ්‍යම ඇමෙරිකානු පොදු වෙළෙඳපොළ (Central American Common Market) සම්බන්ධ මූලස්ථානය ද මෙහි වේ. ගුවාතමාලා නගරය 1776 දී ස්පාඤ්ඤ පාලනය යටතේ අගනගරය ලෙස ආරම්භ කරනු ලැබී ය. 1917 සහ 1918 වර්ෂවල දී ඇති වූ භූමිකම්පාවලින් එය සම්පූර්ණයෙන් ම වාගේ විනාශයට පත් විය. මේ නිසා නගරය නැවත ගොඩනැගීමට සිදුවිය. තවත් භූමිකම්පාවක් 1976 වර්ෂයේ දී ඇති විය. එමගින් ද දහස් ගණන් ජනයා මරණයට පත් වූ අතර විශාල අලාභහානි සිදුවිය.

-බී. වන්නිආරච්චි-