අතාවුද

මෙ නමින් හැඳින්වුණේ තුදුස්වන හා පසළොස්වන සියවස්හි දී සිංහල ආණ්ඩුව යටතේ සේවය කළ සුළු සේවක පිරිසක් බව පෙන්. අතාවුද බාලයන් යනුවෙන් හැඳින්වුණේ ද මොවුන් යයි සිතිය හැකිය. රජුට සේවා කිරීම මොවුන්ට පැවරී තුබුණු රාජකාරිය යැයි අනුමාන කළ හැකිය."රජුට තේවකර සිටින අතාවුදයන්" පිරිසක් ගැන දඹදෙණි අස්නෙහි (තුදුස්වන සියවස) සඳහන් වෙයි. මෙහි අතාවුදයන් ගැන සඳහන් කොට ඇත්තේ සළු වඩන්නන්, දිය වඩන්නන්, බත් වඩන්නන්, තෙල් වඩන්නන්, නානු වඩන්නන්, බුලත් වඩන්නන් ආදි වූ රජගෙදර සුළු සේවකයන් සමඟ බැවින් අතාවුදයන් එකල රජ මාළිගාවේ දී රජුට වතාවත් කළ සුළු සේවක පිරිසක් වූ බවක් පෙනේ. භවන පැරකුම්බාවන්ගේ (1412-1467) ඔරුවල තඹ සන්නසෙහි ද අතාවුද බාලයන් ගැන කියැවෙයි. මෙහි ද අතාවුද බාලයන් ගැන සඳහන්ව ඇත්තේ ඇත්තලයන්, බලුවැද්දන්, දඩවැද්දන් ආදි වූ රජුගේ සුළු සේවකයන්ට පෙරාතුව බැවින් අතාවුද නමින් හැඳින්වුණේ රජුගේ සුළු සේවක පිරිසක් බවට සැකයක් නැත. හත්වන විජයබාහු (1509-1521) රජුගේ වේරගම බෝධිනායක තඹ සන්නසෙහි ද අතාවුද බාලයන් ගැන සඳහන් වෙතත් ඔවුන්ට පැවරී තුබුණු රාජකාරිය කුමක් දැයි යන්න නිගමනය කිරීමට එහි එන තොරතුරුවලින් වහලක් නොලැබෙයි.

     අතාවුදයන් සිංහල ආණ්ඩුව යටතේ සිටි ආයුධ සන්නද්ධ මුරහේවායන් පිරිසක් හෝ ආරක්ෂක හේවායන් පිරිසක් හෝ විය යුතුය යි සිංහල ශබ්දකෝෂයෙහි දැක්වෙයි. අතාවුදයන් කඩු වැනි ආයුධ අතේ දරා සිටි සුළු යුද්ධ නිලධාරි පිරිසකැයි ද, ඇතැම් විට ඔවුන් රජුගේ අංගාරක්ෂක භට පිරිසක් වන්නට හැකි යයි ද කොඩ්රිංටන් මහතා අදහස් කරයි. දඹදෙණි හත්පත්තුවේ අතාවුද මුදියන්සේ පෙළපතේ අය ඉහත දී කස්තාන පැලඳි අංගාරක්ෂක භට පිරිසක් වූ බව කියති.

     අතාවුද නමින් හැඳින්වෙන පෙළපත් නාමයක් ද ලංකාවේ ඇතැම් පළාත්වල ඇත. මොවුන් පැරණි අතාවුදයන්ගෙන් පැවත එන්නන් විය හැකිය. ගොයම් කැපීම් පෑගීම් ආදියේ දී කුඹුරු හිමියා වෙනුවෙන් අස්වැන්න ආරක්ෂාවට හා අස්වැන්න බෙදාගෙන ඒමට යවන තැනැත්තා ඇතැම් පළාතක අතාවුදයා නමින් මෙකල හැඳින්වෙන බව ද සිංහල ශබ්දකෝෂයේ දැක්වේ.

(සංස්කරණය:1963)