අන්නාසි මල
පැරණි සිංහල සැරසිලි මෝස්තරයකි. ගම්පළ යුගයෙන් පසු ව්‍යාප්ත වී ගිය මෙය මහනුවර යුගයට අයත් සිතුවම්වල හා කැටයම්වල විශේෂයෙන් දක්නා ලැබේ.
අන්නාසි මල ශෛලිගත මල් මෝස්තරයකින් ප්‍රභව වූ බව සැලැකේ. ඍජු කෝණාස්‍රයක් තුළ ක්‍රමයෙන් ලොකුවන වෘත්තයන් කිහිපයක් එකට යොදා ගත් ජ්‍යාමිතික සැකිල්ලකින් මොස්තරය සෑදේ. ඇතුළු වෘත්තයෙහි අන්නාසි
ගෙඩිය ද අනෙක් වෘත්තයක් තුළ කොළ ද අඳිනු ලැබේ. ගෙඩිය දැක්වෙන කොටස පුෂ්ප කර්ණිකාවක මෙන් කළ හරස් කැපුම් රේඛාවලින් නිර්මිත ය. එකිනෙකට යාබද ව සිටින සේ හරස් තීරයන්හි මල් සැලැස්ම නැවත නැවතත් ඇඳීමෙන් අන්නාසි මල් මෝස්තරය සෑදේ. ඇතැම්විට එක ම මලක් යොදන අවස්ථා ද ඇත. චතුරස්‍ර ආශ්‍රයෙන් ද මෙම මොස්තරය තනා ගනු ලැබේ.
මෙම මෝස්තරය පිත්තල හා රිදී භාණ්ඩ තනන්නන් අතර ඉතා ප්‍රකටය. බන්දේසි, හෙප්පු ආදියෙහි ද ලී හා ගල් කැටයම්වලද මෙය බෙහෙවින් දක්නා ලැබේ. සිතුවම් ඇඳීමේ දී රාමු ලීස්තර අලංකාර කිරීම පිණිස ද අන්නාසි මල් මෝස්තරය ශිල්පීන් විසින් යොදාගනු ලැබේ.
(සංස්කරණය:1963)
