හත්වාසි කෙළිය
හත්වාසි කෙළිය කඩදාසි කුට්ටමෙන් කරෙන ක්‍රීඩාවන්හි ඇතුළත් වේ. මෙය ගෙතුළ කෙරෙන ක්‍රීඩාවකි. තුන් දෙනෙකුට එක් ම කළ හැකි සේ එය පිළියෙල වී ඇත්තේ ය. පස්වාසි කෙළිය දන්නෙකුට සත්වාසි කෙළිය අසීරු කාරියක් නොවන්නේ ය. එ් දෙකෙහි එතරම් ම එකිනෙකට සමානකම් පවතී.
එක් එක් කොළයට වාසියක් නියමි. වටිනා කොළ එකෙකුට ම නෙබෙදෙන බැවින් එ් වාසිය අතක් පාසා තිදෙනොගෙන් එකෙකුට යේ. එකෙකුට බෙදන කොළ ගණන දොළසකි. ඊට නියමිත වාසි දොළසින් හරි අඩට එකකින් හෝ වැඩි වාසි ගණනක් තනියම ගත්තත් මේ ක්‍රීඩාවේ දී දිනන්නේ ය. මේ දිනීමට වුවමනා ඉතා ම අඩු වාසි ගණන හත බැවින් ‘හත්වාසි’ යන නම මීට ලැබී තිබේ. ක්‍රීඩකයෝ තිදෙනා සමාන කැට ගණනක් ගෙන හත්වාසි කෙළියට වාඩි වෙත්. ක්‍රීඩාවට වුවමනා කොළ 36 පස්වාසි කෙළියට ගත් කූට්ටමට හයේ කොළ හතරක් එක් කිරීමෙන් සම්පූර්ණ වේ. අතක් පාසා තුරුම්පූ නමය බැගින් සිටී. කූට්ටම් කැපීමේ නීතිය කඩදාසි කූට්ටමෙන් කෙරෙන අනෙක් ක්‍රීඩාවන් මෙනි. කොළ දොළෙස බෙදීම වරකට තුන බැගින් සතර වටයකින් කෙළවර කෙරේ. කැටයක අගයක් නියම කරගෙන මුදල් ඔට්ටුවට ද සත්වාසි කෙළින්ට පුළුවන. දිනීම වැඩිවාසි ගණනකින් කරන්නට ඉල්ලා ක්‍රීඩා කිරීමට මෙහි දී අවසර ලබේ.
හත්වාසි කෙළියෙහි පළමුවන රෙපෝරුවට කැට 04ක් ද දෙවන රෙපෝරුවට කැට 07ක් ද තුන්වන රෙපොරුවට කැට 11ක් ද නියමි. දෙවැනි රෙපොරුවෙන් පසු බෙදීම කොළ දෙක බැගින් ය. තුන්වන රෙපොරුව තිදෙනා අතර බෙදා ගත් පසු ඉතිරි වන කැටය තෝන් පිණිස යේ.
(කර්තෘ: ඩී.සී. දිසානායක: 1957)
(සංස්කරණය නොකළ)
