වෙල්ලාල ජයමහ
වෙල්ලාල ජයමහ (1902-1978). ග්‍රන්ථ කර්තෘවරයෙකි, හෙළ හවුලේ කීර්තිමත් කිවිවරයෙකි. 1902 දී දකුණු ලද ගාල්ලේ කොග්ගල දී උපත ලද වෙල්ලාල ජයමහ කොග්ගල ගමේ පාසලින් මූලික අධ්‍යාපනය ලබා පසුව ගාල්ලේ වලව්වත්තේ බිංගෙය අසළ පිහිටි මහා මන්තින්ද පිරුවනින් භාෂා ශාස්ත්‍ර හදාළේ ය. තුරුණු වියෙහි දී ම මුනිදාස කුමාරතුංග පඬිවරයාගේ ඇසුරට පත් හේ පද්‍ය ග්‍රන්ථ රාශියක් ප්‍රබන්ධ කළේ ය. සිංහල භාෂා සාහිත්‍ය හා ව්‍යාකරණය පිළිබඳ විචාරාත්මක ප්‍රබන්ධ රැසක් පුවත්පත් සඟරාවලට සැපයූ වෙල්ලාල ජයමහ සලදළ කුමරුන්ගේ ප්‍රබන්ධය යැයි සැළකෙන 'සැරය' සංස්කරණය කොට මුද්‍රණයෙන් ප්‍රකාශයට පත් කළේ ය.
'අලිසතුරුව', 'උපුල්වන් හබය', 'පිළිසදර' යනාදි කාව්‍ය ප්‍රබන්ධ මුද්‍රණයෙන් පළ කළ ජයමහ වෙල්ලාල හෙළ හවුලේ කවින් අතර උසස් ප්‍රතිභානයන් ප්‍රකට කළ කවියෙකි. එහෙයින් ම හේ මුනිදාස කුමාරතුංග පඬිවරයාණන් වෙතින් 'මහා කවි' සම්මානයෙන් බුහුමන් ලැබී ය. දිවයිනේ පුවත්පත් කිහිපයකට සම්බන්ධ වී කටයුතු කළ ජයමහ වෙල්ලාල කලක් මුනිදාස කුමාරතුංගයන්ගේ හෙළ හවුලේ ප්‍රකාශනය වූ 'සුබසෙහි' ද කතු මඩුල්ලට එක් වී සිටියේ ය.
ඉතා සරල සුගම සිලිටි පදමාලාවකින් කවි බැඳුම සිරිතක් කොටගත් මේ කවියාගේ නිර්මාණ පහන් ගුණයෙන් පිරිපුන් ය.
(කර්තෘ: සරත්චන්ද්‍ර ජයකොඩි)
(සංස්කරණය නොකළ)
