නුබා
ඇන්ග්ලෝ-ඊජිප්තු සුඩානයේ (වර්තමාන දකුණු සුඩානය සහ සුඩානය) දකුණු කෝර්ඩොෆාන්හි කඳුවැටිවල වාසය කරන නීග්‍රෝ ගෝත්‍රයකි. උතුරින් හා බටහිරින් ඔවුන්ගේ අසල්වැස්සෝ අරාබි ජාතික ගෝත්‍රවලට අයත් ය. නැගෙනහිරින් හා දකුණින් නිලෝටික් ගෝත්‍ර වාසය කරති. උතුරු ප්‍රදේශවල වසන නුබාවරුන් අරාබි සංස්කෘතියේ බලපෑමට හසුව ඇති නමුත් දකුණ් දේශවාසීහු තවමත් ඇතැම් විට නග්න ව වාසය කරති.
නුබවෙරු ප්‍රධාන වශයෙන් ගොවිතැනින් ජීවත් වන්නෝ ය. ගෝත්‍රයේ විවිධ කොට්ඨාස පාලනය කරනු ලබන්නේ පර්ජන්‍ය-වස්සවලාහක පූජකයකු විසිනි. නැදෑයන් හැර සෙසු අය අතර විවාහය පවතී. දික්කසාදය ඉතාමත් ලේසි ය. දේපළ උරුමය සිදුවන්නේ මව් පාර්ශ්වයෙනි. අරාබි බලපෑමට හසු වූ උතුරු ප්‍රදේශවාසීන් අතර චර්මච්ඡේදය පවතී.
නුබා කඳුකර ජනයා පිළිබඳ වැදගත් කාරණයක් නම් එහි ව්‍යවහාර වන භාෂා සමූහයයි. සැතපුම් කිහිපයක් අතරතුර වාසය කරන්නවුන් ඔවුනොවුන්ට නොතේරෙන භාෂා කතා කිරීම සාමාන්‍යයයි. මොවුහු දැනට පුළුල් භාෂා කොට්ඨාස දහයකට බෙදා තිබේ.
කපු වැවීම පටන් ගැනීමෙන් පසුව නුබා චිරාගත ජීවන ක්‍රමය විශාල ලෙස වෙනස් වී තිබේ.
(කර්තෘ: එච්.ඇල්. සෙනෙවිරත්න: 1961)
(සංස්කරණය නොකළ)
