දානියෙල්
(Daniel). බයිබලයේ සඳහන් ශ්‍රේෂඨ පුද්ගලයන් කෙරෙන් එක් අයෙකි. ජෙරුසලමෙන් අල්ලා ගෙන සිරකරුවෙකු ලෙස බබිලෝනියට ගෙන යනු ලැබුණු ඔහු ඉශ්වර ප්‍රසාදයෙන් එහි රජුගේ අනු ශාසකයකු වූ වග පැවසේ.
ක්‍රි.පූ. 606 දී නෙබුකද් නසර් රජු ජෙරුසලම අල්ලාගත් අවස්ථාවෙහි එහි රජ පෙළපතට නෑදෑකමින් සම්බන්ධ තරුණයන් කිහිපදෙනෙකු සිරකරුවන් වශයෙන් බැබිලෝනියට ගෙන යනු ලැබිණ. දානියෙල් ද ඉන් එක් කෙනෙකි. බැබිලෝනියානු රජගෙදර නතර කැරුණු ඔහු කිළිටිවීමෙන් වැළකීම සඳහා මාංස ආහාර ප්‍රතික්‍ෂේප කොට ධාන්‍ය ආහාර පමණක් ගැනීම රජුගේ කුතුහලයට හේතු විය. ඉන්පසු රජතුමාගේ ස්වෂාවිචාරක තනතුරට පත්කරනු ලැබ රජුගේ සිත් දිනාගත් හේ බැබිලෝනියානු දිස්ත්‍රික්කයේ දිසා පාලන තනතුරට පත් කරනු ලැබිණි. ඒ අතරතුර හේ තමාගේ සගයන් තිදෙනා ස්වකීය අද්භූත බලයෙන් මරණින් නිදහස් කර ගති. නෙබුකද් නෙසාර් රජුට පිස්සු රෝගය වැළඳෙන බවට අනාවැකියක් පළ කළ දානියෙල් රජවාසල පුරෝහිත තනතුරින් පහ කැරුණ ද බෙල්පසාර් රජුගේ දාරියුස යටතෙහි ද සේවය කළේ ය. බෙල්පසාර් රජුගේ උත්සව දිනක අද්භත බලයකින් බිත්තියේ ලියැවුණ වාක්‍යයක් විග්‍රහ කිරීමෙන් තමා සතු අද්භූත ශක්තිය පෙන් වූ දානියෙල් රජුගේ උදහසට ලක්ව සිංහ ලෙනක දමා මරුමුවට පත් කරවීමට තැත්කැරුණ ද දිව්‍ය බල මහිමයෙන් සිංහ ලෙන තුළ නිරුපද්‍රිතව සිටීමෙන් නැවත වරක් තම දව්‍ය බලය පෙන්නුම් කරන ලදී. පසු කාලයක දි ඔහු ස්වකීය අද්භූත ඥානයෙන් අනාවැකි පළකළෙන් අනාගත වක්තෘවරයෙකු ලෙස සැලකෙන්න විය.
දානියෙල් ගැන මෙම ජනප්‍රවාද ඇතුළත් දානියෙල්ගේ පොත නමැති ග්‍රන්ථයක් බයිබලයේ දක්නට ලැබේ. කොටස් දෙකකින් යුත් එහි පළමුවැන්නේ දානියෙල් සිරකරුවකු වශයෙන් බැබිලෝනියානු රජවාසල දී ගතකළ ජීවිතය ද පෙලහර ද දෙවැන්නෙන් ඔහුගේ දිව්‍ය ඥාන ශක්තිය දක්වන අනාගත වාක්‍යය ද දැක්වේ.
මෙම ග්‍රන්ථය ක්‍රි. පූ. 6 වැන්නේ දී දානියෙල් විසින් ම ලියන ලද්දක් යයි මුලින් අදහස් කරන ලද නමුදු එහි අඩංගු ඓතිහාසික දෝෂයන්, සමය හා ආකල්පයන් භාෂාව (ග්‍රීක වචන ද අඩංගු බැවින්) හා ශුද්ධ ග්‍රන්ථයෙහි දානියෙල්ගේ ග්‍රන්ථයට හිමි තැන යන කරුණු නිසා මෙම ග්‍රන්ථය ක්‍රි. පූ. 6 වැන්නේ දී නොව ක්‍රි. පූ. දෙවැන්නේ දී කරන ලද්දකැයි විශ්වාස කරති. මෙම ග්‍රන්ථය ලිවීමේ පරමාර්ථය වශයෙන් සැලකෙන්නේ සිරියාවේ 4 වැනි අත්තියොකුස් (අත්තියක) රජු විසින් යුදෙව්වන් සමූල ඝාතනය කිරීමට කටයුතු කරන ලද අවස්ථාවේ දී ඔවුන් ධෛර්යවත් කිරීමයි.
(කර්තෘ: පණ්ඩුල ඇඳගම: 1970)
(සංස්කරණය නොකළ)
