අවිඤ්ඤොං
(Avignon). ප්‍රංසයේ ගිනිකොන දිග පිහිටි වෝක්ලූස් (Vaucluse) පළාතෙහි ප්‍රධාන නගරයයි. රෝන් ඩුරාංස් දෙමෝදරට සැතපුම් තුනක් ඊශානෙන් රෝන් ගඟේ වම් ඉවුරෙහි පිහිටි මෙයට මාර්සේල්ස් නගරයේ සිට දුර සැතපුම් 60ක් පමණි. මේ නගරය තුළ ගඟෙහි පිහිටි දූපතක් නිසා එය හරහා පාලමක් ඉදිකිරීමට හැකිවීම හේතුකොට ගෙන මාර්ග සන්ධිස්ථානයක් වශයෙන් අවිඤ්ඤොං නගරය විශේෂයෙන් වැදගත්ය. දකුණු ප්‍රංස වෙරළ බලා ස්විට්සර්ලන්තයේ සිට එන ප්‍රධාන දුම්රිය මාර්ගයට පැරිස් ද්‍රෝණියේ සිට එන දුම්රිය මාර්ගයක් මෙහි දී එක්වේ. පටපිළී විවීම, වයින් පෙරීම, ලී බඩු සෑදීම සහ පලතුරු ටින්වල ඇහිරීම ද හම් ද්‍රව්‍ය, සබන් සහ පෝර සෑදීම ද මෙහි ප්‍රධාන කර්මාන්තයි. අවට ප්‍රදේශයට මිස්ට්‍රාල් නම් සුළඟින් නිතර හානි ඇති වේ. නගරයේ ජනගහනය (1954) 62,768කි.
ෆෝසියානු (ග්‍රීක-අයෝනියානු) ජනපදයක් සේ ආරම්භවුණු අවිඤ්ඤොං පසු කාලයේ දී රෝම, ගොත්, බ' ගන්ඩියානු, ඔස්ට්‍රොගොත් සහ ෆ්රෑංක් යන ජාතීන්ට අත්පත් වූයේය. ඉක්බිති ප්‍රෝවාංස්හි සහ ටූලූස්හි ආදිපාදවරුන්ට හිමිව පැවතුණු එය 12 වැනි ශතවර්ෂයේ අග භාගයේ දී එක්තරා නිදහසක් ද ඉසිලීය. 'බැබිලෝනියානු විප්‍රවාසය' නමින් හැඳින්වුණු කාලයේ දී (1309–1377) පාප්වරුන් පදිංචිව සිටි නගරයක් වශයෙන් දියුණු වෙමින් පැවති මෙය 1791 දී ප්‍රංසයට අයිති විය. එකල මේ නගරය කුඹල් කර්මාන්තය සහ සායම් නිපදවීම සම්බන්ධයෙන් මහත් ප්‍රසිද්ධියක් ලබා තිබුණි. දෙවැනි ලෝක සංග්‍රාමයේ දී අවිඤ්ඤොං නගරයට මහත් හානි සිදුවිය. පාප්වරුන් විසින් ඉදිකරන ලද ප්‍රාකාරයක් ද දේවස්ථාන සහ මාළිගා ආදි විශාල ගොඩනැඟිලි ද මෙහි මේ තාක් පවතී.
(සංස්කරණය: 1965)
