අලි සබ්රි
(1920- ). එක්සත් අරාබි සමූහාණ්ඩු රාජ්‍යයේ අගමැති පදවිය හා ජනාධිපති කවුන්සලයේ සභාපති පදවිය ද (1963– )දරන අලි සබ්රි ජනාධිපති නසාර්ගේ ඉතා කුලුපග මිත්‍රයෙකි. ඔහු ආණ්ඩු ප්‍රතිපත්ති සම්පාදනය කිරීමෙහි අති දක්ෂයකු වශයෙන් ද සලකනු ලැබේ.
1920 අගෝස්තු 20 වැනි දා උත්පත්තිය ලැබූ ඔහු ද්විතීයික අධ්‍යාපනයෙන් පසු යුද්ධාභ්‍යාස විද්‍යාලයට බැඳී 1939 දී උපාධි ලැබීය. අනතුරුව ඔහු ගගන විද්‍යාලයෙහි පුහුණුව ලබා ගුවන් හමුදායට නිලයකට පත් වූයේය. 1948 දී පලස්තීන යුද්ධයට සහභාගි වූ ඔහු 1952 දී මිසර විප්ලවය ආරම්භ කළ නසාර් ප්‍රමුඛ ස්වාධීන නිලධාරි පිරිසට අයත් විය. ටික කලක් ගුවන් හමුදාවේ අණ දෙන නිලධාරි ධුරයක් දැරූ අලි සබ්රි 1953 දී ජනාධිපති තුමාගේ දේශපාලන කාර්යාලයේ අධ්‍යක්ෂ වශයෙන් පත් කරනු ලැබීය. 1956 දී ඔහු ජනාධිපති කාර්යන් පිළිබඳ අමාත්‍ය ධුරයට පත් විය. 1962 සැප්තැම්බර් මාසයේ දී ජනාධිපති කවුන්සලයේ සාමාජිකයෙකු වශයෙන්ද විධායක කවුන්සලයේ සභාපති හෙවත් එක්සත් අරාබි සමූහාණ්ඩුවේ අගමැතිවරයා වශයෙන් ද පත් කරනු ලැබීය.
ඉන්දු-චීන දේශසීමා අරගළය සමථයට පත් කරනු වස් 1962 දෙසැම්බර් මාසයේ දී කොළඹ දී පවත්වන ලද සජාතික අප්‍රිකා- ආසියා බලවතුන්ගේ සම්මේලනයට සහභාගි වීමට ලංකාවට පැමිණි මිසර නියෝජිත පිරිසේ නායකත්වය දැරුයේ අලි සබ්රිය. හෙතෙම සජාතික සමුළුවේ සාමයෝජනා ගැන වැඩිදුරටත් කරුණු පැහැදිලි කර දීම උදෙසා චීන රජයේ හා ඉන්දියානු රජයේ නිලධාරීන් එම දෙරට දී හමුව සාකච්ඡා පැවැත්විය.
(සංස්කරණය: 1965)
