හාන්ස් ක්රිස්ටියන් ඇන්ඩර්සන්
දුගී පවුලක උපන් ඇන්ඩර්සන් කුඩා කල සිට ම මනඃකල්පිත දෑ නිරූපණය කිරීමෙහි සමත්කම් පෑයේය. 1816 දී සිය පියා මිය ගියෙන් එතැන් සිට කිසිවකුගේ මඟපෙන්වීමක් නැතිව හිතුමතයේ ක්රියා කිරීමට වූ හේ පාසැල් ගමන ද අත් හැර දමා කුඩා රඟමඬලක් තනා ගෙන රූකඩ නැටුම් පෙන්වමින් කාලය ගත කෙළේය. සංචාරක නෘත්ය සංගම් මගින් රඟ පාන ලද නෘත්ය දැකීමෙන් ඔහුගේ සිත තව තවත් නෘත්ය කලාව කෙරෙහි ඇදී ගියේය. 1819 දී ඉතා අමාරුවෙන් මුදල් ටිකක් උපයා ගත් හේ කෝපන්හේගන් නගරයට ගොස් එහි රඟහල් කීපයක ම නළුවකු වීමට උත්සාහ දැරූ නමුත් ඒ නිෂ්ඵල විය. එහෙත් හේ තමාට ලබාගත හැකි වූ සෑම නාට්ය ග්රන්ථයක් ම මහත් ආශාවෙන් කියවන්නට විය. භාග්යයකට මෙන් ඔහුට එහි දී වැදගත් මිතුරන් කීප දෙනකුගෙන් උපකාර ලැබිණ. විශේෂයෙන් සවැනි ෆෙඩරික් රජ ඔහු කෙරෙහි කරුණාව උපදවා විද්යාලයකට යවා නොමිලේ අධ්යාපනය ලැබීමට අවස්ථාව සලසා දුන්නේය.
ඇන්ඩර්සන් සිය ප්රථම ග්රන්ථය පළ කෙළේ දෙවැනි වර පාසැල් ගමන ආරම්භ කිරීමටත් පෙරය. කලින් කාව්යකරණයෙහි යෙදුණු මොහු තෙවිසි වියේ දී පළ කළ කාව්යයකින් තරමක ජනප්රියත්වයක් ලබා ගත්තේය. ඉතාලියෙහි සංචාරයක යෙදීමෙන් පසු හේ නවකථාවක් ද සුප්රකට ළමා සුරංගනා කථා ග්රන්ථයේ ප්රථම භාගය (1835) ද ප්රකාශයට පැමිණවූයේය. හෙතෙම කාව්ය හා නවකථා පමණක් නොව නාට්ය හා සංචාරක කථා ද ලිවීමට පටන් ගත්තේය. ‘කැත තාරා පැටියා’ (The Ugly Duckling), ‘අධිරාජයාගේ නව වස්ත්ර’ (The Emperor's New Clothes) හා ‘කුඩා ගිනිකූරු වෙළෙන්දි’ (The Little Match Girl) ඔහුගේ ඉතා ජනප්රිය සුරංගනා කථාවලින් කීපයකි. කැත තාරා පැටියා නමැති කථාව ඔහුගේ ම චරිතය පසුබිම් කරගෙන ලියන ලද්දකැයි කියනු ලැබේ. මෙකල ඔහුගේ සුරංගනා කථා වැඩි හරියක් ම නොයෙක් භාෂාවලට පරිවර්තනය කොට ඇත.
ඇන්ඩර්සන්ගේ සංකල්පන ශක්තියත් සරල ශෛලියත් අප්රාණ දැයට ජීවාරෝපණය කර දැක්වීමේ සාමර්ථ්යයත් නිසා ඔහුගේ කථා කාගේත් සිත් ඇදගන්නාසුලු විය. ඒවා බාලයනට පමණක් නොව වැඩිහිටියනට පවා ප්රයෝජනවත් වනුයේ ඒවායෙහි ජීවන දෘෂ්ටියකුත් සමාජ දර්ශනයකුත් ගැබ්ව ඇති බැවිනි.
(සංස්කරණය: 1967)
