ඌටකමන්ඩ්

(ඌටී). මදුරාසියේ නිල්ගිරි දිස්ත්‍රික්කයෙහි ප්‍රධාන නගරයයි. මේ නගරය පිහිටි තාලුක් ප්‍රදේශය ද ඌටකමන්ඩ් නමින් හැඳින්වේ. මුහුදු මට්ටමේ සිට අඩි 7,220ක් උස් වූ සානුවක පිහිටි මෙහි දේශගුණය ඉතා සනීපදායක හෙයින් ඌටකමන්ඩ් නගරය දකුණු ඉන්දියාවෙහි ජනප්‍රිය සෞඛ්‍ය ස්ථානයකි. මෙහි සා.වා. උෂ්ණත්වය පැ. 58ºක් පමණ වන අතර ශීත ඍතුවේ දී උෂ්ණත්වය පැ. 38ºක් පමණ දක්වා ද උෂ්ණ ඍතුවේ දී පැ. 76ºක් පමණ දක්වා ද අඩු වැඩි වේ. කඳුවලින් වට වූ ඌටකමන්ඩ් නගරයෙහි වැවක් ද තිබේ. අවට කඳුබෑවුම්වල තේ, කෝපි හා සින්කෝනා වතු ඇත. සාලෙම්හි සිට ඌටකමන්ඩ් දක්වා දුම්රිය මාර්ගයක් තිබේ. ජනගහනය (1961) 50,140කි.

(සංස්කරණය: 1974)