උරුගුවේ ගඟ
මෙය දකුණු අමෙරිකාවේ උරුගුවේ රටෙහි ප්රධාන ගංගාවයි. බ්රසීලයේ සොයාර්ර දෝමාර් කඳුවලින් මෙහි මුල් ගංගා වන පෙලෝතාස් හා කැනාස් ගංගා පටන් ගනී. බ්රසීලයේ මාර්සලීනෝ නගරයට මඳක් නැගෙනහිරින් පෙලෝතාස් හා කැනාස් ගංගා එක්වීමෙන් සෑදෙන ගංගාව උරුගුවේ නමින් හැදින්වේ. ඉජුයි, ඊපික්වී, ක්වාරායි, අරාපේ ග්රාන්දී හා නේග්රෝ වම් ඉවුරෙන් මීට එක් වන ප්රධාන අතු ගංගාය. උරුගුවේ ගඟ දිගින් සැතපුම් 1,000ක් පමණ වේ. මෝයේ සිට සාල්තෝ නගරය දක්වා බහුල වශයෙන් නැව් ගමනාගමනය කෙරේ. අවට ප්රදේශයෙහි සත්වපාලනය ඉතා වැදගත් ආර්ථික ව්යාපාරයක් නිසා ගව ආදි සතුන් මෙන් ම මස්, සම් හා ලෝම ආදිය ගඟ ඔස්සේ පහළට ගෙන එන ප්රධාන ද්රව්ය අතර වේ.
මොන්ටි කැසරෝස් සමීපයේ සිට ලා ප්ලාතා පුනීල මෝය දක්වා උරුගුවේ හා ආජන්ටිනා දෙරට අතරත් මොන්ටි කැසරෝස්හි සිට මොන්ටි යාගුදෝ දක්වා බ්රසීලය හා ආජන්ටිනා දෙරට අතරත් දේශසීමා මෙම ගඟ ඔස්සේ වැටී ඇත. බ්රසීලයේ සැන්තා කැතරිනා හා රියෝ ග්රාන්දි පළාත් අතර සීමාව ද මෙම ගඟ ඔස්සේ ම වේ.
(සංස්කරණය: 1974)
