උලුඝ් ඛාන්
දිල්ලියේ අලා උද්දීන් ඛල්ජි (බ.) නම් සුල්තාන්වරයා දවස සිටි දක්ෂ සෙන්පතියෙකි. හෙතෙම එම සුල්තාන්වරයාගේ සොහොවුරා ද විය. ඔවුන්ගේ මාමා වූ ජලාල් උද්දීන් ෆිරෝෂ් ඛල්ජි නම් සුල්තාන්වරයා බලයෙන් පහකිරීම සඳහා කාරා හා මල්වා යන ස්ථානයන්හි සිට අලා උද්දීන් අවශ්ය කටයුතු සූදානම් කරද්දී උලුඝ් ඛාන් ෆිරෝෂ් ඛල්ජිහට තම සොහොවුරාගේ ගුණ වනමින් සොහොවුරා කෙරෙහි සුල්තාන්වරයා තුළ සැකයක් ඇති නොවන ලෙස ක්රියා කෙළේය. 1296 දී කාරාහි දී ෆිරෝෂ් ඛල්ජි මරා දැමීමේ කුමන්ත්රණයට ද හෙතෙම සම්බන්ධ විය.
අලා උද්දීන් ඛල්ජි දිල්ලි සුල්තාන්වරයා වීමෙන් පසුව ද ඔහුගේ ජයග්රහණ සාර්ථක කිරීමට උලුඝ් ඛාන් වෙහෙස ගත්තේය. ගුජරාථයේ කර්ණදේව රජුට විරුද්ධව කරන ලද ආක්රමණයේ දී හමුදා මෙහෙයවූ සෙන්පතීන් දෙදෙනාගෙන් කෙනකු වූ උලුඝ් ඛාන් රන්තම්භෝර් බලකොටුව අල්ලා ගැනීම සඳහා කරන ලද ආක්රමණයේ දී ද හමුදා මෙහෙයවීය. ඔහු ගුජරාථයේ රජු පරාජය කොට ඔහුගේ කමලා දේවී නම් මෙහෙසිය ද අල්ලා ගත්තේය. රන්තම්භෝර් බලකොටුව අල්ලාගැනීමෙන් පසු ඩෙකානය ද ආක්රමණය කිරීමට උලුඝ් ඛාන් සුදානම් වුව ද හෙතෙම ඊට පෙර මළේය.
(සංස්කරණය: 1974)
