ඇබර්ඩීන්
ස්කොට්ලන්තයේ ඇබර්ඩීන්ෂයර් (බ.) කෝරළයේ ප්රධාන නගරයයි. උතුරු මුහුදේ ඩොන් සහ ඩී යන ගං මෝයවල් දෙක අතර බොක්කක පිහිටා ඇති මෙය පාර්ලිමේන්තු කොට්ඨාසයක් මෙන් ම උතුරු ස්කොට්ලන්තයේ ප්රධාන නැව්තොට ද විශාලත්වයෙන් ස්කොට්ලන්තයේ සතර වැනි නගරය ද වෙයි. ගොඩනැගිලි සඳහා යොදනු ලබන දීප්තිමත් කළුගල් වර්ගයක් අසල ප්රදේශයෙන් හාරාගනු ලබන නිසා ඇබර්ඩීන් ග්රැනිට් පුරය යනුවෙන් හැඳින්වෙයි.
විශාල දෙව් මැදුරක් ද විශ්වවිද්යාලයක් ද නගරයේ වැදගත්කම වැඩි කරයි. උතුරු මුහුදේ ඩොගර් බෑංක් මාළු බිමට මුහුණ පා පිහිටි මෙහි ධීවර කර්මාන්තය විශේෂයෙන් දියුණුය. වයිට් ෆිෂ්, හෙරිං සහ සැමන් මෙහි සුලභ මත්ස්යයෝය.
මේ නගරය ඉන්ධන හා වෙළඳ මධ්යස්ථානවලට ඈතින් පිහිටිය ද කර්මාන්ත අතින් පොහොසත්ය. හණ භාණ්ඩ, කඩදාසි, ගොවි භාණ්ඩ, රුවල්, සබන්, ඉටිපන්දම් සහ රසායන ද්රව්ය සෑදීම ද දැව කර්මාන්තය, ඉංජිනේරු කර්මාන්තය සහ මද්යසාරය පෙරීම ද මෙහි කෙරෙන ප්රධාන කර්මාන්තයි. පෙර දී මෙන් දැනුදු කුඩා නැව් තැනීම මෙහි කරනු ලැබේ. ඕට්, කඩදාසි, අර්තාපල්, හම් සහ මාළු ද ගව බැටළු ආදි සත්තු ද ඇබර්ඩීන්හි ප්රධාන නිර්යාතයෝයි.
12 වැනි සියවසේ සිට ම ඇබර්ඩීන් ස්කොට්ලන්තයේ වැදගත් නගරයක් හැටියට සැලකේ. 1336 දී එංගලන්තයේ තුන්වැනි එඩ්වඩ් රජු පැරණි නගරය ගිනිබත් කළ පසු ‘නිව් ඇබර්ඩීන්’ නවනගරය ඉදි කරන ලද්දේය. දෙවැනි ලෝක සංග්රාමයේ දී මෙය ජර්මනුන්ගේ බෝම්බ ප්රහාරයට ලක් විය. ජනගහනය (1962) 185,678කි.
(සංස්කරණය: 1967)
