එලිෆන්ට් පාස්
(අලිමංකඩ). ලංකාවේ ප්රධාන භූමි ප්රදේශය දුම්රිය මාර්ගයෙන් හා මහා මාර්ගයෙන් යාපන අර්ධද්වීපයට සම්බන්ධ වී ඇත්තේ එලිෆන්ට් පාස් නමැති කපොල්ලෙනි. යාපන අර්ධද්වීපයේ වැවෙන තල් ගස්වල ගෙඩි පැසී ගිලිහී වැටෙන සමයෙහි වන්නි ප්රදේශයේ වල් අලි ඒවා කෑමට මේ ස්ථානයෙන් කලපුව හරහා එගොඩ මෙගොඩ වූ නිසා මේ නාමය ව්යවහාරයට පැමිණි බව කියති. දැනට එහි මංමාවත් ඉදි කර ඇත්තේ අඩි 3100ක් පමණ දිගින් යුත් දිය මංකඩක් මතය. වියළි දේශගුණයකින් යුත් මේ ප්රදේශය ලුණු කර්මාන්තයේ මධ්යස්ථානයක් ලෙස ද ප්රසිද්ධය.
කොටස් තුනක් වශයෙන් බෙදා දක්වන ලද ලුණුලේවා පිහිටි ප්රදේශ අතුරෙන් ප්රධාන කොටසට එලිෆන්ට් පාස් අයිතිය. මීට නුදුරු යාපන කලපුව හාත්පස සැතපුම් බොහෝ ගණනක් දුරට විහිදී ඇති වැලි සහිත බිම් ග්රීෂ්ම ඍතුවේ දී එහි හටගන්නා ලුණුවලින් දීප්තිමත් වේ. මේ ප්රදේශය වෘක්ෂලතාදියට අතිශයින් අහිතකරය. මීට නුදුරුව හුනු ගල් සහිත ප්රදේශයක් ද ඇත්තේය. එලිෆන්ට්පාස් නගරය පිහිටා ඇත්තේ කලපුවෙහි උතුරු වෙරළ බඩ අර්ධද්වීපයෙහිය. කොළඹ සිට මීට දුර සැතැපුම් 2143/4කි. යාපනයේ සිට සැතපුම් 32 1/4කි.
(සංස්කරණය: 1974)
