එර්බිල්
ඊශාන දිග ඉරාකයේ කුර්දිෂ් කඳු පාමුල පිහිටි වැදගත් නගරයකි. ග්රීක්වරුන් ආර්බෙලා නමින් හැඳින්වූ මෙනුවර සුමේරියන් සමයේ සිට පැවත එන්නකි. ක්රි.පූ. 2200 පමණේ දී සුමේරියන්වරුන් විසින් පිහිටුවන ලදැයි සිතනු ලබන මේ නගරය ඔවුන් හැඳින්වූයේ උර්බිලියුම් නමිනි. පළමු පෙළේ ඇසිරියානු පුරයක් වූ එර්බිල් අතීතයේ දී ආගමික වශයෙන් ද උසස් තැනක් ගත්තේය. ක්රි.පූ. 331 දී මහා ඇලෙක්සැන්ඩර් අධිරාජයා පර්සියානු අධිරාජ ඩේරියස් III පැරදවූ ආර්බෙලා මහසටන සිදු වූයේ මෙනුවරට සැ. 30ක් පමණ ඈතින් පිහිටි ගෝගමේලා නම් ස්ථානයේ දීය.
එර්බිල් නගරයේ අඛණ්ඩ ඉතිහාසය එනුවරට පදනම්ව ඇති නෂ්ටාවශේෂමය ගොඩැල්ල කියාපායි. මෝසුල් හා බග්දාද් නගර අතර දිවෙන තවලම් මාර්ගයක් මැද පිහිටි වත්මන් එර්බිල් නගරය වෙළඳ මංසන්ධියක් වශයෙන් වැදගත්ය. මෙහි ජනගහනය (1957) 35,000කි.
එර්බිල් නගරය පිහිටා ඇති පළාත හැඳින්වෙන්නේ ද එර්බිල් නමින් මය.
(සංස්කරණය: 1974)
