එළු දළදා වංශය
මෙකල මහනුවර දළදා මැදුරෙහි වැඩ සිටින බුදුරදුන්ගේ වම් දළදා වහන්සේ ලක්දිවට වැඩම කරවන ලද්දේ කිත්සිරිමෙවන් රජුගේ (ක්රි.ව. 304-332) නවවැනි රාජ්ය වර්ෂයෙහිය. එකල විසූ සිංහල කවීන් විසින් දළදාවහන්සේගේ ආගමන ප්රවෘත්ති සංඛ්යාත වංශකථාව හෙළබසින් ලියා තබන ලද්දේය. මහාවංසයෙහි (37, 93) “දාඨාධාතුස්ස වංසම්හි වුත්තෙන විධිනා ස නං”යි ඒ බව සටහන්ව ඇත. පාලි දාඨාවංසයෙහි ද
“සදෙසභාසාය කවීහි සීහළෙ
කතම්පි වංසං ජිනදන්තධාතුයා”යි
සිංහල කවීන් විසින් සියබසින් කළ දළදාවංසයක් ගැන සඳහන් වේ. මේ දෙතැන්හි මැ සඳහන් කරන ලදුයේ එක් මැ දළදාවංසයක් විය හැකිය. මෙසේ නාම මාත්රයෙන් අසන්නට ලැබෙන සියබසින් කළ දළදාවංසය මෙකල නාමශේෂ ග්රන්ථ ගණයෙහි ලා සලකනු ලැබේ. මේ එළු දළදාවංසය ගද්ය ග්රන්ථයෙක් වී ද පද්ය ග්රන්ථයෙක් වී දැයි ඒකාන්තයෙන් නිශ්චය කළ නොහැකිය. දාඨාවංසයෙහි සිංහල කවීන් විසින් කරන ලදැයි කී හෙයින් ඇතැම් කෙනෙක් එළු දළදාවංසය පද්ය ග්රන්ථයෙකැයි කියති. කවියකු විසින් ගද්යයෙන් ද ලියැ හැකි හෙයින් එය ප්රමාණ කළ නොහැකිය.
(සංස්කරණය: 1974)
