ඔට්ටක්කූත්තන්
(ඔට්ටක්කූත්තර්). දෙවන කුලෝත්තුංග නම් චෝල රජුගේ (1138–1150) රාජසභාවෙහි වැජඹුණු උසස් දෙමළ කිවියෙකි. කම්බන් (බ.) නම් සුප්රකට දෙමළ කිවියා එම රාජසභාවට පැමිණීමෙන් පසු ඔවුනොවුන් අභිභවා සිටීමේ ආශාවෙන් මඩනා ලද ඔවුන් දෙදෙනා අතර නොයෙකුත් වාදභේද පැනනැඟිණ. ඉන් ප්රයෝජන ගන්නට සිතූ රජ තෙමේ ඔවුන් දෙදෙනා ම රාමායණය දෙමළ කවියට නඟන්නට යෙදැවිය. එම තරගයෙහි දී තමා මඳක් දුර්වලව සිටි බව වටහාගත් ඔට්ටක්කූත්තන් කළකිරීමට පත්ව තම කාව්යය විනාශ කර දමන්නට තීරණය කෙළේය. එහෙත් කම්බන් විසින් ස්වකීය ප්රතිවාදියාගේ එම විනාශකාරී ක්රියාව අතරමඟ දී නතර කොට ඔහුගේ කාව්යයෙහි උත්තර කාණ්ඩය පමණක් බේරාගන්නා ලදි. කම්බන් විසින් කරන ලද මුල් කාණ්ඩ හා සමඟ එය දැනට පොදුවේ කම්බ රාමායණය යන නමින් දන්නා දෙමළ රාමායණ කාව්යයෙහි අන්තර්ගතව ඇත. අවශේෂ කාණ්ඩ හා සංසන්දනය කරන කල්හි තරමක් දුර්වල ලෙස පෙනුණ ද එය ප්රශස්ත කෘතියකි.
කුලෝත්තුංග රජු වරගුණ නම් පාණ්ඩ්ය රජුගේ දුව සරණ කරගැනීමේ දී ලත් දායාදයෙන් කොටසක් වශයෙන් පාණ්ඩ්ය රාජසභාවෙන් චෝල රාජ සභාවට එවන ලද පුගලෙන්දි (බ.) නම් කිවියා හා සමඟ ද ඔට්ටක්කූත්තන් බොහෝ විට තරඟයෙහි යෙදිණි. එහෙත් හැම විට ම වාගේ හුරුබුහුටි පුගලෙන්දි අතින් හෙතෙම පරාජය ලැබීය. ඔවුන් දෙදෙනා අතර පැවැති වාදභේද ගැන නොයෙකුත් කථාප්රවෘත්ති අසන්නට ලැබේ.
කම්බන් ස්වකීය ප්රතිභාවෙන් ද පුගලෙන්දි ස්වකීය බුද්ධිප්රභාවයෙන් ද ඔට්ටක්කූත්තන් අභිභවා සිටිය ද හෙතෙම සම්භාවනීය කිවියෙක් විය. ඔහු විසින් ‘පරණි’ නම් යුද්ධ ව්යාපාර වර්ණනා කාව්ය හා ‘උලා’ නම් විජයෝත්සව වර්ණනා කාව්ය රචනා කිරීමෙහි විශේෂ නිපුණතාවක් දක්වන ලදි. පරණි කාව්ය අතුරෙහි ඔහුගේ තක්කයාගප්පරණි නම් කාව්යයත් උලා කාව්ය අතුරෙහි ඔහුගේ මුවර්උලා නම් කාව්යයත් ඉතා විශිෂ්ට කෘති ලෙස සැලැකෙයි. චෝල රජුන් තිදෙනකුගේ විජයෝත්සව වර්ණනා කරන මුවර්උලා කාව්යය වූකලි උලා කාව්යත්රයයකින් සැදුම් ලද්දකි.
(සංස්කරණය: 1974)
