ඒබිරෝ

(පැරණි ඉබේරුස්). අයිබීරියන් අර්ධද්වීපයට අයත් මහා ගංගා පසෙන් එකකි. මෙම ගංගා අතුරෙන් මධ්‍යධරණී මුහුදට වැටෙන එක ම ගඟ ද මෙයයි. ස්පාඤ්ඤයේ ඉතා ම දිග ගංගාව (සැ. 575) වූ මෙය කැන්ටබ්‍රියන් කඳු අතර පිහිටි ෆොන්ටාබ්‍රේ නම් කුඩා ග්‍රාමයෙන් පටන් ගෙන දකුණු දෙසට ගලා ගොස් කෝර්තෝසා නගරයට ඔබ්බෙහි දී මධ්‍යධරණී මුහුදට වැටෙයි. මෙය ව.සැ. 32,000ක් පමණ වූ බිම් පෙදෙසකට ජල සම්පාදනය කරයි. ඇරගන් ප්‍රදේශයට ජලසම්පාදනය කරන ඇරගන්, සෙග්රේ යන ගංගාවෝ මෙහි ප්‍රධාන අතු ගංගාවෝයි. මෙම ගංගාව අසබඩ පිහිටා ඇති නගර අතර සාරගෝසා, ලොග්රෝන්යෝ, තෝර්තෝසා, කාලාඕරා, තුදේලා, කැස්පේ යන නගරයෝ ප්‍රධාන වෙති.

ස්පාඤ්ඤයේ නිෂ්පාදනය කරනු ලබන ලෝම අතුරෙන් වැඩි හරියක් ම ලැබෙන්නේ ඒබිරෝ මිටියාවතිනි. තවද, ජලවිදුලි මධ්‍යස්ථාන කීපයකට ම ඒබිරෝ ගංගා මණ්ඩලයෙන් ජලය සපයනු ලැබේ.

(සංස්කරණය: 1974)