ඔකායාමා

(Okayama). ජපානයේ හොන්ෂු දූපතේ බටහිර පිහිටි ‘කෙන්’ පළාතක් ද එහි අගනුවර ද මෙනමින් හැඳින්වේ.

ඔකායාමා පළාත ව.සැ. 2,727ක් විශාලය. 1960 දී එහි ජනගහනය 1,670,454ක් විය. කෘෂිකර්ම ආර්ථික රටාවක් ඇති එහි ප්‍රධාන වගා නම් වී, මිදි, පීච් හා පන් ආදියයි.

ඔකායාමා නගරය මධ්‍ය ඔකායාමා තැන්නෙහි ආසාහි නම් ගංගාව අසල පිහිටියේය. ජනගහනය (1970) 375,000කි. කෘෂිකාර්මික යන්ත්‍රෝපකරණ, කපුරෙදි හා රබර් ද්‍රව්‍ය නිෂ්පාදනය ගැන මෙම නගරය ප්‍රසිද්ධය. 18 වන සියවසේ දී මෙහි පිහිටුවන ලද මහජන උද්‍යානය ජපානයේ ප්‍රශස්තතම උද්‍යාන තුනෙන් එකක් වන අතර ඔකායාමා විශ්වවිද්‍යාලය එහි වෛද්‍ය විද්‍යාලය නිසා මහත් කීර්තියක් උසුලයි.

(සංස්කරණය: 1974)