ඔලිව් කන්ද
ඔලිවෙටි කන්ද නමින් ද දන්නා මෙය ජුඩියානු සානුවෙහි ජෙරුසලම් නගරයට නැගෙනහිරින් පිහිටි අඩි 2,700ක් උස කඳුවැටියකි.
ක්‍රිස්තු භක්තිකයන්ගේ සිද්ධස්ථානයක් හැටියට ප්‍රකට මෙය හේබ්‍රෙව් ජාතික වීරයකු වූ දාවිත් රජතුමා සිය පුත් අබ්සලොම් කෙරෙන් පලාගොස් සැඟවී සිටි ස්ථානය වශයෙන් පරණ තෙස්තමේන්තුවේ ද යේසුස්වහන්සේ නිතර ගැවසුණු ස්ථානය වශයෙන් අලුත් තෙස්තමේන්තුවේ ද සඳහන් වේ.
මෙම කඳුවැටියෙහි ගැලිලී, ඇසෙන්ෂන්, ප්‍රොෆට්, ඔෆෙන්ස් යනුවෙන් කඳු මුදුන් සතරක් ඇත. මේවා එක එකක් බයිබලයේ එන කිසියම් සිද්ධියක් ආශ්‍රිතය. ගැලිලී කඳු මුදුන යේසුස්වහන්සේ ස්වර්ගාරෝහණය කළ ස්ථානය වශයෙන් විශ්වාස කරනු ලැබේ. ගෙත්සෙමනී උයන පිහිටියේ මෙම කන්ද පාමුලය. ප්‍රොෆට් කන්දෙහි ඉපැරණි සොහොන් ගුහා වෙයි. ඔෆෙන්ස් කන්දෙහි සොලමන් රජතුමා විසින් ඉදි කරන ලද දේවස්ථාන ඇත.
වත්මන්හි ජෙබල් එල් තෝර් යන අරාබි නාමයෙන් ද ඔලිව් කන්ද හැඳින්වේ.
(සංස්කරණය: 1974)
