ඉවාවෝ ඔයාමා

(1842-1916). ජපානයේ යුද සෙනෙවියෙකි. කයෝෂිමාහි උත්පත්තිය ලබා යුරෝපයේ යුද පුහුණුව ලද මොහු සත්සුමා වංශිකයකු වුව ද මෙයිජි රජයට විරුද්ධව මෙහෙයවන ලද 1877 සත්සුමා කැරැල්ලේ දී මෙයිජි අධිරාජයාට පක්ෂපාතව ක්‍රියා කළේය. ප්‍රථම චීන-ජපන් යුද්ධයේ දී ආතර්, වේ-හයි-වේ යන බලකොටු අල්ලාගත් දෙවෙනි සේනාංකයට අණ දෙන ලද්දේ ඔයාමා විසිනි. පසුව ෆීල්ඩ් මාර්ෂල් තනතුරට උසස් කරනු ලැබූ ඔයාමා රුසියානු ජපන් යුද්ධයේ දී මැංචූරියාවේ හමුදාවනට අණ දුන්නේය. අගමැතිවරුන් පත්කිරීම් ආදි වැදගත් රාජ්‍ය කටයුතුවල දී පවා අධිරාජයාට උපදෙස් දුන් හේ විශිෂ්ට ලෙස යුද්ධ කටයුතුවල නිරත වීම නිසා ඉතා උසස් රාජ්‍ය සම්මාන ද ලැබීය.

(සංස්කරණය: 1974)