අටකලන් කෝරළය

රත්නපුර දිස්ත්‍රික්කයේ කොළොන්නා, කුකුළු, නවදුන්, මැද හා කඩවත් යන කෝරළවලින් වටවී පිහිටි ප්‍රදේශය අටකලන් කෝරළය නමින් හැඳින්වෙයි. අතීතයෙහි එක්තරා රජ කෙනෙකු හා කෙළෙඹියා දිනූ බැවින් ඔහුට අටකලන්දක් පමණ භූමි ප්‍රදේශයක් රජු විසින් දෙන ලද බව ද ඒ හේතු‍කොටගෙන මේ ප්‍රදේශය අටකලන්ද රට නමින් ප්‍රසිද්ධ වූ බව ද කියනු ලැබේ. වර්ග සැතපුම් 176½ක් පමණ විශාල එහි ජනගහනය (1953) 63,998කි. ප්‍රධාන නගරය රක්වානය. මැණික් ගැරීම හා රබර් වැවීම ප්‍රධාන ව්‍යාපාරික ආදායම් මාර්ගයෝය. පස ඉතා සරු නිසා ද දේශගුණයෙහි ඇති යෝග්‍යතාව නිසා ද මෙහි වී ගොවිතැන සරුවට කළ හැකිය. කඳු බෑවුම්වල තේ ද වවනු ලැබේ. ඇත්ගල වැව පිහිටියේ මෙහිය.

(සංස්කරණය:1963)