අතිගුප්ත

මධ්‍යම ඉන්දියාවේ සිට ක්‍රි.ව. 652 පමණේ දී බුද්ධධර්මය ප්‍රචාරය පිණිස චීනයේ අගනුවරට ගිය ඉන්දියානු බෞද්ධ භික්ෂුවකි; උසස් සාහිත්‍යධරයෙකි. මෙතුමා චීනයට ගිය කාලයේ චීනය පාලනය කරනු ලැබුවේ තාං රාජ වංශයට අයත් කාඕ-ත්සුං (Kao-tsung) නැමති රජු විසිනි. චීනයේ අවුරුදු කිහිපයක් නතර වී සිටි මෙතුමා විසින් ක්‍රි.ව. 653 හා 654 යන වර්ෂවල දී ඉන්දියානු බෞද්ධ ග්‍රන්ථ කිහිපයක් චීන භාෂාවට පරිවර්තනය කරන ලද බව කියති. ධාරණිසංග්‍රහ සූත්‍රය මෙසේ පරිවර්තනය කරන ලද ග්‍රන්ථවලින් එකකි. ඉන්දියානු බෞද්ධ ග්‍රන්ථ චීන භාෂාවට පරිවර්තනය කිරීමේ දී එකල ඉන්දියාවේ සිට චීනයට පැමිණ සිටි සංඝානන්ද මෝක්ෂ හා කාශ්‍යප යන ඉන්දියානු භික්ෂූන් දෙනමගේ සහාය ලැබුණු බව ද කියති.

(සංස්කරණය:1963)