අනනියස්

මෙනමින් හැඳින්වෙන කීපදෙනකුන් ගැන බයිබලයේ සඳහන් වේ. මොවුන් අතුරෙන් වඩාත් ප්‍රකට තිදෙනෙක් වෙත්:-

 1. 	ක්‍රියාපොතේ පස්වන පරිච්ඡේදයේ දැක්වෙන අනනියස් ප්‍රථම ක්‍රිස්තියානි සමාජයේ සාමාජිකයෙකි. ඔහු තමා සතු ඉඩමක් විකුණා ලද මිලෙන් කොටසක් ස්වකීය භාර්‍ය්‍යාව වූ සපිරාගේ ද දැනීම ඇතිව තමා වෙත තබාගෙන, ඉතිරි කොටස ගෙන ගොස් ඉඩම විකුණූ මුළු මුදල හැටියට අඟවා ප්‍රේරිතයන්ගේ පාමුල තැබීය. ඒ දුටු පේතෘස් (පේදුරු) තුමා "නුඹ බොරු කීවේ මනුෂ්‍යයන්ට නොව දෙවියන්වහන්සේටය"යි කියමින් ඔහුට චෝදනා කළේය. ඒ ඇසූ අනනියස් බිම වැටී මළේය. ඊට තුන් පැයකට පසු එහි පැමිණි සපිරාගේ මරණය සිදු වූයේ ද එපරිද්දෙනි.

 2. 	දමස්කස්හි ක්‍රිස්තියානි සභාවට අයත් වූවෙකි. ක්‍රිස්තුස්වහන්සේගේ අනුගාමිකයන්ට පීඩා කිරීමේ විපාක වශයෙන් ඇස් නොපෙනී ගිය සාවුල්ට (පසුව පාවුල්) ඇස් පෙනීම ලබා දීම පිණිස යවන ලද්දේ මොහු ය.

 3. 	යෙරුසලමේ දී පාවුල්තුමාට විරුද්ධව ඉදිරිපත් කරන ලද චෝදනා විභාග කළ මන්ත්‍රණ සභාවේ මුලසුන දැරූ උත්තම පූජකයෙකි. මන්ත්‍රණ සභාව ඉදිරිපිටට පැමිණ වූ පාවුල්තුමා සභාව අමතා කථාකරද්දී මොහු එතුමාගේ කටට ගසන ලෙස ළඟ සිටියවුන්ට අණ කෙළේය. ක්‍රි. ව. 47 සිට 59 දක්වා උත්තමපූජක ධූරය දැරූ මොහු රෝමන්වරුන්ගේ මිතුරෙකැයි යන චෝදනාව පිට යුදෙව්වන් අතින් මැරුම් කෑවේය.