අන්තක්‍රිස්තුස් (විරුද්ධ ක්‍රිස්තුස්)
යන්න ශුද්ධ බයිබලයෙහි සඳහන් වී ඇත්තේ ශු. යොහන්ගේ යැවුම් පත්‍ර දෙකක පමණය. මෙහි අන්තක්‍රිස්තුස් නම් යේසුස් ක්‍රිස්තුස්වහන්සේ මාංසයෙන් යුක්තව ආ බව ඒත්තු නොගන්නා වූ ද යේසුස්වහන්සේ ක්‍රිස්තුස්වහන්සේ යයි නොපිළිගන්නාවූ ද තැනැත්තාය. අන්තක්‍රිස්තුස් යන්නේ අඟවනු ලබන්නේ නපුරුකමේ බලය යයි කල්පනා කරන බොහෝ දෙන බයිබලයේ (ii තෙසලෝනි 2,3 – 10) සඳහන් ක්‍රිස්තුස්වහන්සේගේ දෙවැනි ඊමට පෙර එළිදරව් විය යුතු පාපයේ මනුෂ්‍යයා තුළ අන්තක්‍රිස්තුස් ගුණාංග දකින්ට ඇති බව කියත්. දෙවියන් වහන්සේගේ සමාප්තික ජයග්‍රහණයටත් උන්වහන්සේගේ රාජ්‍යය මුලුමනින් මෙලොව පිහිටුවීමටත් පෙර නපුරාගේ බලය බොහෝ සේ වර්ධනය වන බව අලුත් ගිවිසුමේ එන අදහසකි. නමුත් මේ නපුරුකමේ අධිපතිකම ඉතා සුළු කලකට පමණක් පවතින්නකි. මේ සමඟ ම ක්‍රිස්තුස්වහන්සේ නපුරාගේ බලය බිඳ හෙළා උන්වහන්සේගේ රාජ්‍යය මෙලොව පිහිටුවනසේක. ඓතිහාසික පුද්ගලයකු තුළ අන්තක්‍රිස්තුස් අදහස සම්පූර්ණ වී ඇතැයි විශ්වාස කරන ඇතැමෙක් ක්‍රිස්තුවර්ෂයෙන් පළමු ශතවර්ෂයේ රෝම අගරජව විසූ නීරෝ මෙන් ක්‍රිස්තුභක්තිකයන්ට පීඩා කළවුන් අන්තක්‍රිස්තුස් යයි කල්පනා කරත්. යුදෙව් ලබ්ධිකයන් අතර ද අන්තක්‍රිස්තුස් වාදයක් ඇති නිසා ක්‍රිස්තු භක්තිකයන් මෙහි ප්‍රධාන අංග යුදෙව්වන්ගෙන් ගන්ට ඇතැයි යනු සමහරුන්ගේ පිළිගැනීමයි.
කර්තෘ:ලක්දාස ද මැල් අග්‍ර රාජගුරු ප්‍රසාදි
(සංස්කරණය:1963)
