අබු අබ්දල්ලා ඉබන් අල් කාෆිෆ්
( .....982) ලක්දිවට පැමිණි දේශ සංචාරක පර්සියානු ජාතිකයෙකි. සමන්ගිර (ශ්‍රී පාදය) වැඳීමට මහමදාගමිකයනට පළමුව මාර්ගය කියා දුන්නේ මොහු යයි ඉබන් බතුතා පවසයි.
ඉබන් බතුතා මොහු ගැන කියා ඇති පුදුම කථා පුවතක් මෙසේය. අබ්දල්ලා මුස්ලිම් පූජකයන් තිස්‌ දෙනෙකුන් සමඟ සිරිපා අඩවියෙහි සැරිසැරීය. ඔහු කැටුව ගිය පිරිස ආහාර සොයා ගත නොහැකි වූයෙන් අලි පැටියෙකු මරා මස් අනුභව කළහ. අබ්දල්ලා මේ ක්‍රෑර ක්‍රියාවෙන් ඔවුන් වැළැක්වීමට ගත් වෙහෙස නිෂ්ඵල විය. හේ ඒ අපවිත්‍ර ආහාරය එකහෙළා ප්‍රතික්ෂේප කළේය. එම රාත්‍රියෙහි අලි රංචුවක් පැමිණ පූජකයන් තිස්‌ දෙනා විනාශ කළ අතර නායක අලියා විසින් අබ්දල්ලා පිට උඩ තබාගෙන සුරක්ෂිතව අසල ගමකට ගෙන යනු ලැබීය යනුයි. එතෙක් ගර්හිතව සිටි මුස්ලිම් ජාතිකයන් සිංහලයන්ගේ සැලකිල්ලට පාත්‍ර වූයේ මේ අද්භූත ක්‍රියාව දැකීමෙනැයි ද ඉබන් බතුතා සඳහන් කරයි.
ක්‍රි.ව.982 දී කලුරිය කළ මොහුගේ මාතෘදේහය ෂිරාස්හි භූමදාන කළ බව ඉබන් බතුතා පවසයි. සිරිපා කන්ද අසල මොහුගේ යයි සැලකෙන සොහොනක් තිබුණ බවත් සඳහන්වේ.
(සංස්කරණය:1963)
