අබුද්, ඊබ්‍රහිම්
(1900) මොහු සුඩානයේ මහා යුද්ධ හමුදා මන්ත්‍රණ මණ්ඩලයේ සභාපති සහ යුද්ධ ආණ්ඩුවේ නායකයා ද වේ. ක්‍රි.ව.1900 දී මොහොමද් ගොල්හි උපන්නේය. මොහුගේ පියා සුඩාන්හි බ්‍රිතාන්‍ය ආණ්ඩුව පැවති කාලයේ සුළු නිලධාරියෙක් විය. කාර්ටූම්හි ගෝඩන් මෙමොරියල් විද්‍යාලයේ ඉංජිනේරු අංශයෙන් උපාධියක් ලබා ගත් ඊබ්‍රහිම් ක්‍රි.ව.1917 දී යුද්ධ ශිල්පයතනයට බැඳුණේය. ඉක්බිති යුධ හමුදාවට බැඳුණු ඔහු නොබෝ කලකින් එහි උසස්ම තත්වයට පැමිණියේය. සුඩානු යුධ හමුදාවේ අණ දෙන නිලධාරියා වශයෙන් පත්කරනු ලබූ ප්‍රථම සුඩානු ජාතිකයා ද ඔහු විය. මේ පත්වීම ඔහුට ලැබුණේ 1949 දීය. 1952 දී සුඩානු ආරක්ෂක හමුදා මහා කාර්යාලයේ ප්‍රධාන නිලධාරියා හැටියට පත්වුණු ඔහු 1954 දී මේජර් ජනරාල් පදවියකට ද පත් කරන ලදි. 1956 දී ඔහු සුඩානු යුධ හමුදාවේ සේනාධිපතියා විය. යථෝක්ත පදවි දැරූ කාලය තුළ ඔහු දේශපාලන කටයුතුවලට කිසි විටකත් නොබැඳුණේය.
1956 සිට අගමැති පදවිය දරමින් සිටි අබ්දුල් කලීල්ගේ යෝජනාව පරිදි 1958 දී ඊබ්‍රහම් අබුල් සුදන්හි යුද්ධ ආණ්ඩුවක් පිහිටුවා එහි නායක ධුරයට පත්විය.
ඉන්පසු හිටපු අග්‍රාමාත්‍යවරුන් වූ ඉස්මයිල් එල් අසාර් හා අබ්දුල් කලීල් ද, සිද්දික් එල් මාදි නම් තවත් පිළිගත් ජන නායකයෙකු ද විසින් යුද්ධ ආණ්ඩුව අවලංගු කොට ඡන්ද බලයෙන් ව්‍යවස්ථානුකූල ආණ්ඩුවක් පිහිටවන් ලෙස කිහිපවරක් ඉල්ලම් කරන ලදි. එහෙත් එම ඉල්ලීම් ඉෂ්ඨ නොවීය.
ආර්ථික පුනරුත්ථාපන ප්‍රතිපත්තියක් අනුගමනය අබුද්ගේ යුද්ධ ආණ්ඩුව යටතේ සුඩානයේ ආර්ථික ක්‍රමයෙහි දියුණුවක් ඇති විය.
(සංස්කරණය:1963)
