අබ්දල් ලතීෆ්
(1162 -1231). අරාබි ලේඛකයෙකි, බහුශ්‍රැතකි. ක්‍රි.ව.1162 දී බැග්ඩෑඩ් නගරයේ උපන් අබ්දල් ලතීෆ් තර්ක, ව්‍යාකරණ, පුරාවෘත්ත, දර්ශන, ගුප්ත විද්‍යා ආදිය හදාරා, 1189 දී මොසූල්, සිරියා, මිසර යන ප්‍රදේශවල සංචාරයෙහි යෙදුණේය. කලක් මිසර රාජ සභාව හෙබ වූ ඔහුට එහි දී උගතුන් බොහෝ දෙනෙකුගේ ආශ්‍රය ද ලැබුණේය. ක්‍රි.ව.1207 දී මිසරයෙන් නික්ම ටික කලක් දමස්කස් නුවර ගත කළ ඔහු ඉන්පසු ගියේ අර්ඝන්ජාන්හි විසු ආලා අල්-දීන් දාවුද් ෂා කුමරුගේ රජසභාවටය. රාෂ්ට්‍ර විප්ලවයක් හේතු කොට ගෙන ක්‍රි.ව. 1228 දී යළිත් බැග්ඩෑඩ් නගරයට පැමිණි හෙතෙමේ ක්‍රි.ව.1231 දී මිය ගියේය. මිසර දේශය පිළිබඳ ඔහුගේ නිබන්ධනයන්, ලතින්, ප්‍රංස, ජර්මන් යන භාෂාවලට පරිවර්තනය කරන ලදින් යුරෝපීයයන්ට ඔහු ගැන දැනගන්නට ලැබිණි. එවක පැවති විවිධ ශිල්ප ශාස්ත්‍රයන් පිළිබඳ විශාල ග්‍රන්ථ සංඛ්‍යාවක් ඔහු අතින් ලියවිණ.
(සංස්කරණය:1963)
