අබ්ද්-අල්-සමාද්

(1525-1600). පර්සියාවේ ෂිරාස් නගරයේ උපන් මොහු මුස්ලිම් ජාතික චිත්‍ර ශිල්පියෙකි. තරුණ වයසේ දී ම ඉන්දියාවට ගිය අල්-සමාද් තෙමේ හුමායුන් අධිරාජයා (1530-1556) යටතේ සේවයට පත්විය. සුලේඛනයෙහි (Calligraphy) උසස් පුහුණුවක් ලැබ සිටි මොහු 1577 දී අක්බාර් රජු විසින් කාසි මුද්‍රාංකණයෙහි අධිපතියා වශයෙන් පත් කරනු ලැබීය. එවක අක්බාර් රජුගේ කාසිවල සැලැස්ම පිළියෙල කරන ලද්දේ අල් සමාද් විසිනි. අක්බාර් රජු ළමාකල ඔහුට චිත්‍ර ශිල්පය ඉගැන්වූ අල්-සමාද් පසුව ඔහුගේ අනුශාසකයා වශයෙන්ද කටයුතු කළේය. දාස්වාන්ත් (බ.) නමැති සුප්‍රසිද්ධ හින්දු චිත්‍ර ශිල්පියා අල්-සමාද්ගේ ශිෂ්‍යයෙකි. තම ශිෂ්‍ය බවට පත් වූ හින්දු මුස්ලිම් චිත්‍ර ශිල්පීන් සිය ගණනකගේ සහායයෙන් "අමීර්-හම්සා" නමැති ග්‍රන්ථය අලංකාර කිරීම පිණිස මොහු විසින් සිතුවම් දහස් ගණනක් සපයන ලදි. විවිධ ශෛලීන් අනුගමනය කිරීම හේතු කොට ගෙන මෙම සිතුවම්වලට සංකීර්ණ ලක්ෂණ ඇතුළුවීම නොවැළැක්විය හැකි විය. ඇඳුම් පැලදුම්, ආයුධ, වෘක්ෂලතා ආදියෙහි දී දේශීය චිත්‍ර සම්ප්‍රදාය ද, ගොඩනැගිලි සැරසිලි හා පර්‍ය්‍යාලෝක විදීන්හිදී පර්සියානු සම්ප්‍රදාය ද බයිබල් චිත්‍ර අනුකරණය නිසා යුරෝපීය චිත්‍ර සම්ප්‍රදායද "අමීර්-හම්සා" සිතුවම්හි පිළිබිඹු වේ.

(සංස්කරණය:1963)