අභයනාග
(රා.ස.231-240). අනුරාධපුරයේ රජ කළ ලම්බකර්ණවංශික රජෙකි. පළමුවන සිරිනාග රජුගේ කනිෂ්ඨ පුත්‍රයා ද, වෝහාරකතිස්ස රජුගේ කනිෂ්ඨ සහෝදරයා ද වූ මෙතෙම අභාසෙන්, අභාතිස්ස යන නම්වලින් ද හැඳින්වේ.
වෝහාරකතිස්ස රජුගේ බිසව සමඟ මිත්‍රව සිටි මෙතෙම රජුට ඒ බව සැලවීම නිසා බියපත් වූයේ ඉන්දියාවට පලා ගියේය. කලකට පසු අභයනාග දෙමළ යුද සෙනඟක් කැටුව ආපසු ලක්දිවට පැමිණ තම මයිල් ශුභදේවයන්ගේද ආධාර ඇතිව වෝහාරකතිස්ස රජු මරා රාජ්‍යය අත්පත් කර ගත්තේය. වෝහාරකතිස්ස රජුගේ බිසව අගමෙහෙසුන් තනතුරෙහි තබා මෙතෙම අට අවුරුද්දක් රජ කෙළේය. මොහු දෙමළ යුද සෙබළුන්ගේ ආධාරයෙන් ලක්රජය අයිති කරගත් ප්‍රථම සිංහල රජු හැටියට සඳහන් කළ හැකිය.
මේ රජු ශ්‍රී මහාබෝධිය හාත්පස ශෛලමය වේදිකාවක් ද ලෝවාමහාප්‍රාසාදය ඉදිරිපිට මණ්ඩපයක් ද කරවා දෙලක්ෂයක් වටිනා වස්ත්‍ර භික්ෂු සංඝයාට දුන් බව මහාවංශයෙහි සඳහන්වේ.
(සංස්කරණය:1963)
