අමීර්
මෙය මුස්ලිම් රාජ්‍ය කිහිපයක ම පාලකයන් හැඳින්වුණු තනතුරු නාමයයි. ආරබියෙහි බෙඩුවින් ජාතිකයන්ගේ නායකයන් ද හැඳින්වුණේ අමීර් යන්නෙනි. තුර්කියේ පාරම්පරික කුලවතුන්ට ද අමීර් යන නාමය භාවිත වේ.
අමීර් යන්නෙහි මුල් තේරුම වූයේ යුද්ධ හමුදාවක අණ දෙන නිලධාරියා යනුයි. එහෙත් කල්යෑමේ දී මේ තනතුරු නාමය යුද්ධ හමුදාවේ වෙනත් උසස් නිලධාරීන්ට හා ප්‍රාදේශික ආණ්ඩුකාරවරුන්ට දී ඇති බව පෙනේ. පසුකලක අමීර් යන පදය මහමත්තුමාගේ පරම්පරාවෙන් පැවත එන්නන්ට ව්‍යවහාර කළ ගෞරවවාචක පදයක් විය.
අමීර් නාමය මධ්‍යම ආසියාවේ ඇෆ්ඝනිස්ථානය හා බුඛාරා වැනි මුස්ලිම් රාජ්‍ය කිහිපයක ම රජවරුන්ට ව්‍යවහාර කළ බව පෙනේ. පර්සියාවේ සමනිද් හා තහිරිද් රජවරුන් ද, මිසරයේ තුලුනිද් රජවරුන් කිහිපදෙනකුන් ද, ස්පාඤ්ඤයේ උමයියද් රජවරුන් ද හැඳින්වුණේ අමීර් නමිනි. ක්‍රිස්තු භක්තික අමීර්වරුන් කිහිපදෙනකුන් ද පලස්තීනයේ ලෙබනන් ප්‍රදේශයේ සිටි බවට සාක්ෂ්‍ය ඇත. නාවික බළ ඇණියේ ප්‍රධානයා හැඳින්වෙන ඉංග්‍රීසි 'ඇඩ්මිරල්' (admiral) ශබ්දය අමීර් යන්න ප්‍රභව කොට ඇත්තේය.
(සංස්කරණය:1963)
