අයන් ගේට්ස්
(අයෝද්වාර). ඩැනියුබ් ග‍ඟේ ඇලිවලින් හා සැඩ දිය පහරින් යුත් දොරු සහිත කොටස අයන් ගේට්ස් නමින් හැඳින්වේ. රුමේනියාවේ ඔර්ශෝවා හා ටූනුසෙවරින් නම් වූ නගර අතර සැතැපුම් 2ක් පමණ ගඟ ගලන්නේ ගල්පර හා පිටට නෙරූ ගල්තුඩු සහිත පටු මාර්ගයකය. මේ කොටසේ සමහර තැනක ඉවුරු දෙක අතර දුර යාර 100කට වැඩි නොවේ. ගඟ ගලා යන්නේ අඩි 230ක් පමණ පහළ ප්‍රපාතයකය. මෙම පටු දොරු ප්‍රදේශය ඩැනියුබ් ගඟ දිගේ කෙරෙන නැව් ගමනාගමනයට ඇති ප්‍රධාන ස්වභාවික බාධාවය. අයන් ගේට්ස් හෙවත් මෙම අයෝද්වාර ඩැනියුබ් නදියේ පහළ කොටසේ සීමාවය. සැඩපහර අධික බැවින්, ගඟ ඉහළට යන යාත්‍රා ඇදගන යෑම පිණිස ධූමයන්ත්‍ර යාත්‍රා, කේබල් ආදිය වේ. ටොන් 700කට වැඩි බර ඇති නැව් මෙසේ ද ඇදගන යා නොහැකි බැවින් ටූනූසෙවරින් නගරය අසල දී ලොකු නැව්වල බඩු කුඩා යාත්‍රාවලට පටවනු ලැබේ.
මෙම දොරු ප්‍රදේශයේ ගල් ඉවුරු පිපිරවීමෙන් ගඟ පුළුල් කොට යාත්‍රාවලට ආරක්ෂාව සැලසීමට කීපවිටක් සර්බියන් ජාතිකයෝත් රුමේනියන්වරුත් උත්සාහ කළහ.
අයන් ගේට්ස් පාලනය 1921 දී ජාත්‍යන්තර කොමිසමකට පවරන ලද නමුත් හිට්ලර්ගේ ප්‍රතිඥා කඩකිරීම කරණකොට ගෙන ඉන් වැඩක් නොවීය. දැනට මෙහි කටයුතු සෝවියට් ආණ්ඩුවේ පාලනයෙහි පවතී.
(සංස්කරණය:1963)
