ජීන්ස් (Jeans)
තරුණ තරුණියන් අතර බෙහෙවින් ජනප්‍රිය කලිසම් විශේෂයකි. මෙම ඇඳුමට තවත් නම් කීපයක් තිබේ. Dungarees, Denims, Levis යනු ඉන් කීපයකි. අවසානයට සඳහන් ඛැඩසි යන නාමය එන්නේ මෙම කලිසම් විශේෂය 1870 දශකයේ දී ඇ.එ.ජ.හි සැන් ෆ‍්‍රැන්සිස්කෝ නගරයේ වෙළෙඳසැලක් පවත්වාගෙන යමින් සිට හඳුන්වා දුන් ලෙවි ස්ට‍්‍රව්ස් (Levi Strauss) නම් ජර්මන් ජාතිකයා සිහිපත් කරමිනි.
ජීන්ස් යන කලිසම් විශේෂයෙහි ඉතිහාසය ඉතාලියේ ජෙනෝවා (Genoa) නගරය හා බැඳී පවතී. එහි 18 වන සියවස වන විට කපු නූලෙන් කළ කොඞ්රෝයි වැනි ඝන රෙදිවර්ග අතර ඩෙනිම් යනුවෙන් හැඳින්වුණු රෙදිවර්ගයක් ද විය. මෙම රෙදිවර්ග යුරෝපයේ වෙනත් රටවලට හා ඇමෙරිකා එක්සත් ජනපදයට අපනයනය කරන ලදි.
ලෙවි ස්ට‍්‍රව්ගේ වෙළෙඳසැලෙන් තොග ගණනේ තඹ බොත්තම් සහ රිවට් ඇණ ලබා ගත් ජෙකබ් ඬේවිස් නම් ඇඳුම් මසන්නෙක් ඒවා ඝන රෙද්දෙන් මැසූ කලිසම්වලට යෙදීම ඇරඹුවේ කලිසම්වල වඩා ආතතියට පත් වන කොටස් එමගින් සංරක්ෂණය වූ හෙයිනි. කම්හල් සේවකයන් හා පතල්කරුවන් වැනි බර වැඩෙහි නිරතවූවන් අතර එය ජනප්‍රිය වන බව දැන සිටි ඬේවිස් මෙම කාර්යය මහා පරිමාණයේ කර්මාන්තයක් බවට පත්කිරීම සඳහා මුදල් ආයෝජනයට ස්ට‍්‍රව්ස් එකඟ කරවා ගනිමින් 1873 දී ඒ සඳහා පේටන්ට් බලපත‍්‍රයක් ද ලබා ගත්තේ ය. ලෙවිස් (Levi's) යන වෙළෙඳ නාමය මෙම කලිසම් සඳහා යොදා ගැනුණේ මේ අනුව ය.
මුල දී කම්කරු ජනයා අතර පමණක් භාවිත වූ ජීන්ස් කලිසම 1950 හා 60 දශකයන්හි දී තරුණ තරුණියන් අතර ජනප්‍රිය වන්නට විය. ඊට එක් හේතුවක් වූයේ ජේම්ස් ඞීන් නම් ජනප්‍රි නළුවා විසින් 'රිබෙල් විතවුට් අ කෝස්' (Rebel without a cause) චිත‍්‍රපටයේ එම ඇඳුම ඇඳ සිටීම ය. මුල දී පුරුෂ පක්ෂය පමණක් භාවිත කළ මෙම කලිසම මේ කාලයේ දී ම තරුණියන් අතර ද ජනප්‍රිය විය. ඒ අයුරින් 1970 දශකය වන විට ඇ.එ.ජ. මෙන් ම ලොව බොහෝ රටවල මෙම කලිසම සැහැල්ලූ (Casual) ඇඳුමක් ලෙස බොහෝ දෙනා අඳින්නක් බවට පත් ව තිබුණි. ජීන්ස් කලිසම පසුව කෙතරම් ජනප්‍රි වුයේ ද යත් එය විලාසිතාවක් බවට ද පත් විණි. ඇඳුම් සැලසුම් ශිල්පීන් විසින් විශේෂ ජීන්ස් කලිසම් නිපදවනු ලැබුවේ මේ අනුව ය. එසේ ඩිසයිනර් ජීන්ස් (Designer Jeans) නම් විශේෂ කලිසම් ද සැලසුම් විය. මේ විලාසිතාවේ ස්වභාවය මැන ගත හැක්කේ ඇ.එ.ජ.යේ සාමාන්‍ය ජීන්ස් කලිසමක් ඩොලර් 40කට පමණ මිලයට ගත හැකි අතර ඩිසයිනර් ජීන්ස් කලිසමක් ඩොලර් 800ක් පමණ වීමෙනි.
කර්තෘ:කේ.එන්.ඕ. ධර්මදාස
(සංස්කරණය:2014)
