අඳු
උම්බෙලිෆෙරෙ (බ.) කුලයට අයත් මේ ශාකය සාමාන්‍යයෙන් වැවෙන්නේ පාළු ඉඩම්වලය. මෙය නිවර්තන ඇමෙරිකාවේ දේශජ පැළෑටියකි. නයාට අඳුකොළ නුරුස්සන බව සාමාන්‍ය පිළිගැනීමයි. "නයාට අඳුකොළ වගේ" යයි ප්‍රස්තාව පිරුළක් ද වෙයි.
සාන්සෙවියෙරියා ගිනීන්සිස් (Sansevieria guineensis) නමැති හණ ජාතියට අයත් පැළෑටි වි‍ශේෂයකටත් අඳු යන නම ලංකාවේ ඇතැම් ප්‍රදේශවල භාවිත කරනු ලැබේ. මේ ශාකයේ කඩුවක හැඩය ඇති කොළවල හරස් අතට වැටී තිබෙන අළු පාට සටහන් නයකුගේ ශරීරයේ තිබෙන සටහන්වලට සමානය. එබැවින් නයා මේ ශාකයේ කොළ දුටු විට බිය වෙතැයි යන මතයක් ද ඇත. මේ ශාකය ලිලියාසේ කුලයට අයත්ය.
අප්‍රිය ගඳකින් යුත් කොළ ඇති අඳුතලා වෙනත් ශාක විශේෂයකි. මෙය ඔසිමුම් වි‍ශේෂයක් විය හැකිය. එසේනම් එය ලබියා‍ටේ කුලයට අයත් ශාකයකි.
ආයුර්වේද මතය: තුලසි වර්ගයට අයත් අඳු (අඳුතලා) කෘමිරෝග, කැස්ස, අරුචිය, ප්‍රතිශ්‍යා, සෙම්රෝග, ශ්වාස හා ව්‍රණ නසයි. සර්ප විෂට හා පිස්සු බලු විෂට ද මෙය වෙනත් ඖෂධ වර්ග සමග යොදනු ලැබේ.
(සංස්කරණය:1963)
