තකාඕකා
(Takaoka). ජපානයේ තොයාමා (Toyama) ප‍්‍රාන්තයේ දෙවන විශාලතම නගරයයි. උස් යන අරුතැති තකා සහ කන්ද හෝ උස් බිම යන අරුතැති ඕකා යන වචනද්වයෙන් මෙහි නාමය නිෂ්පන්න ය. හොකුරිකු ශින්කන්සෙන් (Hokuriku Shinkansen) අධිවේගී දුම්රිය මාර්ගයෙහි පිහිටියේය. එනයින් ගොකයාමා (Gokayama) යන සංචාරකයින්ගේ තාවකාලික නවාතැන්පොළක් බවට පත්ව තිබේ. අතීතයේ සිට ලෝහ වාත්තු කර්මාන්තයට ප‍්‍රසිද්ධියක් ඉසිලූ මෙම නගරය ලෝකඩ තඹ සහ ලැකර් භාණ්ඩවලට ප‍්‍රසිද්ධ ය. ජපානය පුරා ඇති බෞද්ධ සිද්ධස්ථානයනට ඝණ්ඨාර සහ බුදු පිළිම වැඩි වශයෙන් සැපයෙනුයේ මෙම නගරයෙනි. මී.15.85ක් උසැති දැවැන්ත ලෝකඩ බුදු පිළිමය මෙම නගරයේ සංචාරක ආකර්ෂණයකි. ඊට අමතරව කෝජෝ (Kojo) උද්‍යානය සහ ජාතික වස්තුවක් සේ සැලකෙන සුයිරුයි-ජි (Zuiryū-ji) සෙන් සිද්ධස්ථානය පිහිටියේ ද මෙහි ය. 1889 අප්‍රේල් පළමුවන දා පිහිටුවනු ලැබිණු මෙම නගරයේ භූමි ප‍්‍රමාණය වකිමී. 209.42කි. ජනගහනය 173,086 (2018) කි. මෙහි තෙතමනය සහිත උපනිවර්තන දේශගුණයක් බලපවත්වයි. ශීත කාලයේ දී අධික හිමපතනයට ලක් වේ. සාමාන්‍ය වාර්ෂික ආර්ද්‍රතාව 79%කි.
කර්තෘ: රන්ජන දේවමිත‍්‍ර සේනාසිංහ
(සංස්කරණය නොකරන ලද-2022)
