ජීවමිතිකය (Biometrics)
පරිගණක තාක්ෂණය යොදා ගනිමින් පුද්ගලයන්ගේ අනන්‍යතාව හඳුනාගත හැකි / තහවුරු කිරීමේ ස්වයංකි‍්‍රය ක‍්‍රමවේද නිර්මාණය කිරීමේ විද්‍යාත්මක ක්ෂේත‍්‍රය ජීවමිතිකය ලෙස හැඳින්වේ. ‘Bio’ මගින් ‘ජෛව’ හෝ ‘ජීව’ යන අර්ථයත් ‘Metrics’ මගින් ‘ප‍්‍රමාණාත්මක විශ්ලේෂණය' යන අර්ථයත් පාදක කර ගනිමින් Biometrics හෙවත් ජීවමිතිකය ගොඩනැගී ඇත.
මේ අනුව පුද්ගලයන්ගේ සහජ ලක්ෂණ වන ඇඟිලි සලකුණු, ඇසේ කනීනිකාවේ ලක්ෂණ, ඡායාරූප මගින් පිළිබිඹු වන මුහුණේ ලක්ෂණ හා කටහඬවල රටා ආදිය පුද්ගල අනන්‍යතාව තහවුරු කරගැනීම සඳහා දැනටමත් භාවිත වේ. මෙම තාක්ෂණය මගින් ක්ෂණික ව හා නිවැරදි ව පුද්ගලයන් හඳුනාගැනීමට හැකි වීම, රාජ්‍ය ආරක්ෂක කටයුතු හා එදිනෙදා කාර්යාල කටයුතු සඳහා ඉමහත් රුකුලක් වී ඇත.
වේලාපත් සැකසීම, සේවක වේතන ලැයිස්තු සැකසීම, පරිගණක ගිණුම් සැකසීම, දුරකතන / පිටපත් යන්ත‍්‍ර භාවිතය, පැමිණීමේ හා පිටවීමේ වේලාවන් සනිටුහන් කිරීම ආදිය මෙවැනි කාර්යාල ප‍්‍රයෝජනවලින් සමහරක් වන අතර, ඇතුළුවීම සීමිත ආරක්ෂිත ස්ථානවලට ඇතුළුවීම, ත‍්‍රස්තවාදීන් / භයානක පුද්ගලයන්ගේ හැසිරීම් / ගමන් රටා පිළිබඳ තොරතුරු දැනගැනීම, ආරක්ෂිත කටයුතු ආශි‍්‍රත ප‍්‍රයෝජන අතුරින් සමහරක් වේ. දැනට විවිධ ඉලෙක්ට්‍රොනික උපකරණ භාවිතයේ දී හා විද්‍යුත් තැපැල් හා වෙබ් අඩවි භාවිතයේ දී ආරක්ෂිතභාවය සඳහා අනන්‍යතාව තහවුරු කර ගැනීමට යොදාගන්නා ‘මුරපද’ (Password) අමතකවීම, සොරාගැනීම වැනි ගැටලූ මගහරවා ගැනීමට, ජීවමිතිකය යොදාගැනීම දැන් බොහෝ සේ ජනපි‍්‍රය වෙමින් පවතී.
ජීවමිතික කටයුතු සඳහා යොදාගන්නා පරිලෝකන යන්ත‍්‍ර භාවිතය මුල් අවධියේ දී විශාල ලෙස මිල අධික වුව ද තාක්ෂණයේ දියුණුවත් සමග එය දැරිය හැකි මට්ටමකට අඩු වී ඇත. (පින්තූරය)
ඇඟිලි සලකුණු මගින් වේලාව සටහන් කරන යන්ත‍්‍රයක්
ෂාමලා තිරිමාන්න
