සිනමික් අම්ලය
සිනමික් අම්ලය (Cinnamic Acid). මෙය අනුක සුත්‍රය C9 , H8, O2 වූ අසංතෘප්ත ඒකභාෂ්මික අම්ලයකි. බෙන්සැල් ඇසිටික් අම්ලය, බීටා ෆිනයිලැක්රික් අම්ලය (B-phenylacrylic acid), ස්ටයිරිල්ෆෝමික් අම්ලය (styrylformic acid), ට්‍රාන්ස් බෙන්සිනි ප්‍රොපනොයික් අම්ලය (benzene propanoic acid) යන නම්වලින් ද හැදින්වේ. සිනමික් අම්ලය, කුරුඳු තෙල්, බෝල්සම් (balsam) හා ස්ටෝරැක්ස්වල (storax) අන්තර්ගත සංඝටකයකි.
සිනමික් අම්ලයේ අණුක භාරය 148.11 කි. ව්‍යූහ සූත්‍රය C6 H5CH = CHCOOH වේ. මෙය වර්ණ රහිත හා ගන්ධය රහිත ස්ඵටිකරූපී අම්ලයකි. විශිෂ්ට ගුරුත්වය 1.248 කි. ද්‍රවාංකය සෙ.133කි. තාපාංකය සෙ.300 කි. මධ්‍යසාර හා ඊතර්වල ද්‍රාව්‍ය වේ. එහෙත් ජලයේ මඳ වශයෙන් ද්‍රාව්‍ය වේ. සිස්-ට්‍රාන්ස් සමාවයවික ස්වරූපයෙන් පවතී.
සීනමික් අම්ලය බෙහෝ කාබනික සංයෝග සංශ්ලේෂණයේ දී වැදගත් වේ. සුවඳ විලවුන් සෑදීම සඳහා අවශ්‍ය එස්ටර් නිපදවීමේ දී ද ඉන්ඩෝල් (Indol) සාදාගැනිමේ ප්‍රතිකාරකයක් ලෙස ද භාවිත කෙරේ.
(කර්තෘ: ඩබ්.එම්.ඩබ්. වලිසිංහ: 1998)
(සංස්කරණය නොකළ)
