ඩිස්ටැම්පර්
(Distemper). ඩිස්ටැම්පර් ගොඩනැගිලි කර්මාන්තයේ දී, බිත්ති මතුබිට ආලේප කරන දියරමය මිශ්‍රණයකි. එය අවශ්‍ය වර්ණ මිශ්‍ර කර ප්‍රයෝජනයට ගැනේ. ඩිස්ටැම්පර් නිපදවනු ලබන්නේ කුඩු වශයෙනි. මෙම කුඩු සමඟ වැඩි ප්‍රතිශතයක් සුදු පැහැති පිරවුම් ද්‍රව්‍ය ද ඇත. එයට බන්ධන ද්‍රව්‍ය එකතු කිරීමෙන් මතුපිට ආලේපිත ද්‍රව්‍ය සේදී නොගොස් වැඩි කලක් පවතී. ඩිස්ටැම්පර් වල ද්‍රාවකය ලෙස යොදා ගන්නේ ජලයයි.
ඩිස්ටැම්පර් වල ආසන්න සංයුතියෙහි 75%ක් ද වරණක කුඩු 11%න් ද බන්ධන මැලියම් 12%ක් ද උකුකාරක ද්‍රව්‍ය 0.4ක් ද කල්තබා ගන්නා ද්‍රව්‍ය 0.4%ක් ද සහ දියවීම සදහා උපකාරක ද්‍රව්‍ය 0.4%ක් ද ඇත. වර්ණක කුඩු ලෙස ලිතෝපෝන් ද බන්ධන ද්‍රව්‍ය ලෙස පොලිවිනයිල් ඇසටේට් ද උකුකාරක ද්‍රව්‍ය ලෙස සෙලොසියස් ද දියවීම සඳහා උපකාරක ද්‍රව්‍ය ලෙස ඇතැම් සෝඩියම් ලවන වර්ග ද භාවිත කරනු ලැබේ.
මේ මිශ්‍රණය ඉතා සියුම් ලෙස අඹරා වෙළෙඳ පොළට නිකුත් කරයි. අවශ්‍ය ආලේපය කිරීමට ප්‍රථම නියමිත ප්‍රමාණයට ජලය එකතු කර ද්‍රව්‍යක් සාදාගනු ලබයි. ඉතා උකු නොවූ හෝ දියාරූ නොවු මිශ්‍රණ බිත්තිවල ගෑමට පහසු වේ.
(කර්තෘ: උපාලි එම්. සේනානායක: 1994)
(සංස්කරණය නොකළ)
