විලියම් හෝගාර්ත්
(William Hogarth) (1697.11.10 - 1764.10.26). ඉංග්‍රීසි ජාතික චිත්‍ර ශිල්පියෙකු, වූ මෙතෙම උපහාසාත්මක චිත්‍ර සම්බන්ධයෙන් මහත් කීර්තියට භාජන ව සිටියෙකි. කැටයම් ශිල්පියෙකු සහ ග්‍රන්ථ කර්තෘවරයෙකු වශයෙන් ද උසස් ස්ථානයක් දිනා ගන්නට හෝගාර්ත් සමත් විය. ඒ අතර කතුවැකි කාටූන් ශිල්පියකු මෙන් ම සමාජ විචාරකයකු ලෙස ද ප්‍රකට ය.
රිචර්ඩ් හෝගාර්ත් (Richard Hogarth) සහ ඈන් ගිබොන්ස් (Anne Gibbons) යන දෙමාපියන්ට දා ව ලන්ඩනයෙහි දී පහළ මධ්‍යම පාන්තික උපන් මෙතෙම දොළොස් හැවිරිදි වියෙහි දී රිදී කම්කරුවකු වෙත කැටයම් ශිල්පය ඉගෙනීමට පටන් ගත්තේ ය. 1720 දී තමාගේ ම ආයතනයක් විවෘත කරගත් මෙතෙම මුල් අවධියේ ප්‍රකට ව ගියේ කැටයම් කපන්නෙකු, මෝස්තර අඳින්නෙකු වශයෙනි. රිදී සහ තඹ තහඩුවල කැටයම් කැපීම කරන ලද්දේ එම අවධියේ ය. 1720 දී හෝගාර්ත් වැන්ඩර්බැන්ක්ගේ ඇකඩමියට ඇතුළු වූයේ ය. පැරණි චිත්‍ර ශිල්පීන් අනුකරණයට විරුද්ධ වූ හෙතෙම ස්වකීය මහජ නිර්මාණ ශක්තිය විදහා දැක්වූයේ ය. 1729 දී හෝගාරත් ‘ජින් ත්‍රෝන්හිල්’ (Jane Thornhill) සමඟ විවාහ වූයේ ය.
1950 දී පමණ ඔහුගේ කලා ජීවිතයෙහි ලා විවේචනය මතු කරන්නට වූයේ ය. ඔහුගේ ශෛලිය උපහාසාත්මක වූයෙන් ආදායම අඩු විය. හෝගාර්ත් තෙලි කූර ඉවත් කොට කැටයම් කැපීමට ම පටන් ගත්තේ ය. එහෙයින් ඔහුගේ අවසාන චිත්‍ර වූයේ ‘The Lady’s Laot Stak’ (1758) සහ ‘Sigisunda’ ය. අවාසනාවකට මෙයින් අන්තිම චිත්‍රය නිම කරන්නට ඔහුට නොපිළිවන් විය. සමාජය උපහාසයට ලක් කිරීමේ, චිත්‍ර ඇදිමෙහි විශේෂ දක්ෂතාවක් දැක් වූ හෝගාර්ත්, සදාචාරයට හිතවත් වූ චිත්‍ර ඇන්දේ ය. චිත්‍ර කලාවේ අලුත් ශාඛාවක් බිහි කළ ඔහු, එහි ස්වීකරණය සඳහා මධ්‍යකාලීන සම්ප්‍රදාය උපකාරී කර ගත්තේ ය. තුල්‍යවාදයෙන් ඔප් නැගුණු තියුණු උපහාසයෙන් බර වූ තොරතුරක් චිත්‍රයෙන් කියා පෑමට නෛසර්ගික ශක්තියක් ඇති ව සිටි හෝගාර්ත් ශෝභාතත්වය සහ විභූතිය විලාසිතාව ව පැවැති සමයෙක දී ඉංග්‍රීසි චිත්‍ර කලාවට පරිපුර්ණ අවංකතාවය සහ උද්‍යෝගය එක් කළේ ය.
A Harlot’s Progress, The Marriage Settlement, The Inspection, The Lady's Death, The Graham Children, A Rake's Progress, The Shrimp Gisl, Calais Café ආදී චිත්‍ර ඔහුගේ කෘති අතර ප්‍රකට ය. එයින් මෙහි අවසානයෙහි සඳහන් චිත්‍රය ප්‍රංශ ගතිපැවැතුම් සිනහවට ලක් කරන්නකි.
හෝගාර්ත් ලන්ඩනයේ දී මිය ගිය අතර ඔහුගේ දේහය Chiswick Old Cemeteryහි මිහිදන් කෙරිණ.
(කර්තෘ: විමල් අබේසුන්දර: 1956)
(සංස්කරණය නොකළ)
12.10.56 අත් පිටපත ලැබුණා. 12.10.56 විෂය සුචියෙහි ඇතුළත් කළා.
