හික්කඩුවේ තිලකාරාමය
කොළඹ ගාලු පාරේ 60 වැනි සැතපුම් කණුව අසල හික්කඩුවේ හෙට්ටිගොඩ ප්‍රදේශයේ පිහිටි පැරණි බෞද්ධ විහාරස්ථානයකි. හික්කඩුවේ ශ්‍රී සුමංගල නාහිමිගේ උපන් නිවස ද පිහිටා ඇත්තේ මේ අසල ය. එම අරමේ ආරම්භය මීට ශත වර්ෂ දෙකකට පමණ ඉහත දී වී යයි සිතති. හික්කඩුවට නුදුරින් පිහිටි තොටගමුවේ පුරාණ තොටගමු විහාරය පෘතුගීසීන් විසින් විනාශ කළ පසු එය නැවත ගොඩ නැංවීමට වෙහෙසුණු පල්ලන්තර පුඤ්ඤසාර හිමියන්ගේ ශිෂ්‍ය මහහික්කඩුවේ මාහිමියන් විසින් 1750 දී පමණ තිලකාරාමය ආරම්භ කෙරිණ. හික්කඩුවේ ශ්‍රි සුමංගල නාහිමියන්ගේ ඇදුරු අරන්ගමුවේ නාහිමි විසූයේ ද මේ ආරාමයේ ය. උන් වහන්සේ එම ස්ථානය බෙහෙවින් දියුණු කළහ. ඉන්පසු එහි ආධිපත්‍ය ලත් සුමංගල නාහිමි ද උන්වහන්සේ හා සමකාලීන වූ හබරකඩ සෝණුත්තර නාහිමියෝ 1850 දී පමණ එහි ආධිපත්‍ය ලැබූහ. උන් වහන්සේගෙන් පසු එ් දෙනමගේ ශිෂ්‍ය කහවේ පේමරතන හිමි අධිපති වූහ. උන්වහන්සේගෙන් ඉක්බිති එහි ආධිපත්‍යය ලද්දෝ පණ්ඩිත වලිවිටියේ සෝරත නාහිමිපාණෝ ය.
(කර්තෘ: හපුගොඩ සුමනතිස්ස ස්ථවිර: 1966)
(සංස්කරණය නොකළ)
