නුබියන්
(Nubians). දකුණු ඊජිප්තුවේ ද උතුරු ඇන්ගෝලා-ඊජිප්තු සුඩානයේ ද නයිල් මිටියාවතට අයත් ප්‍රදේශයේ වසන ජනයා ය. නූබියා, නුබියර්, බරබ්‍රා, බර්බෙරින් ආදි නම්වලින් ද හඳුන්වනු ලැබේ. මොවුහු බොහෝදුරට හැමිටික් වර්ගයට අයත්වන නමුත් නීග්‍රෝ, අරාබි හා තුර්කි මිශ්‍ර ය. වඩාත් ම පිරිසුදු නුබියන්වරු කෙනුස්, ෆඩිජා, වහස් ආදි උතුරු කොට්ඨාසවලට අයත් ය. සාමූහික වශයෙන් බරබ්‍රා යන නමින් හැඳින්වෙන්නේ මොවුහු ය. නුබියන් භාෂාවේ හැමිටික් මෙන් ම සුඩාන් ලක්ෂණ ද දක්නා ලැබේ. අරාබිවරු සුඩානය ආක්‍රමණය කරන්නට පෙර දකුණු ඊජිප්තුවේ සිටි ඛාර්ටුම් ප්‍රදේශය දක්වා භූමිභාගයෙහි නුබියන් රාජධානි දෙකක් විය. මෙම රාජධානි දෙක්හි තරමක් දියුණු ස්වදේශීය සංස්කෘතියක් වී ය. එහෙත් මුස්ලිම්වරුන් වන වර්තමාන නුබියන්වරුන්ගේ සමාජ සංවිධානය ඉස්ලාම් ධර්මයේත් අරාබි සංස්කෘතියේත් දැඩි බලපෑමට හසු වී තිබේ. දේශපාලන වශයෙන් නුබියන්වරු කෙනුසි, ෆෙයාඩිචා, මහස්, දනග්ලා යන කොට්ඨාස සතරින් සමන්විත ය.
කෘෂිකර්මය කළ හැකි නයිල් මිටියාවතේ වසන නුබියන්වරු කෘෂ්කාර්මික කටයුතුවල යෙදෙත්. ජලය හිඟකම නිසා අවශ්‍ය ප්‍රමාණයට ධාන්‍ය වවාගත නොහැකි නිසා පිරිමි පක්ෂයේ බොහෝ දෙනා රක්ෂාව සඳහා පිට ප්‍රදේශවලට යති. බොහෝ නුබියන්වරු තම භාෂාව හැරුණුවිට අරාබි භාෂාව ද කථා කරති. එහෙත් ස්ත්‍රී පක්ෂය සාමාන්‍යයෙන් රටින් පිට නොයන නිසා තම භාෂාව පමණක් කථා කරති. ඔවුහු කැලැල් ඇති කිරීම සඳහා තම කම්මුල් තුවාල කර ගනිති. ඔවුන්ගේ ගෙවල් අරාබි ක්‍රමයට චතුරශ්‍රාකාර ය.
(කර්තෘ: එච්.ඇල්. සෙනෙවිරත්න: 1961)
(සංස්කරණය නොකළ)
