නාමල් කුමාර ඇල්ල
මහවැලි ගංගාවේ අතු ගංගාවක් වන අඹං ගඟ ගලා යනුයේ මාතලේ දිස්ත්‍රික්කයේ ගඟල පල්ලේසිය පත්තුව බද ව ය. මේ ගඟ පිහිටි දිය ඇල්ලක් නාමල් කුමාර ඇල්ල නමින් හැඳින්වෙයි. ශක්තිමත් පුරුෂයෙකුට එගොඩ මෙගොඩ පැන යා හැකි පමණ පටු ගල් දෙබොක්කාවකින් ඒ ස්ථානය අසල දී යාර සියයක් තරම් පළල් අඹන් ග‍ඟේ සම්පූර්‍ණ ජල කඳ රිංගා ගොස් අඩි සිය ගණනක් උස් වූ ගලක් පහළට ඇද වැටෙයි. දර්‍ශනීය වූ මේ දිය ඇල්ලෙන් වැටෙන ජලය සුලියක් බවට හැරී නිරන්තරයෙන් පොළොව යටට ඇදී යන සැටියක් පෙනෙතත් තරමක් ඈත දී එය යළිත් ගඟ බවට හැරී ගලා යයි.
නාමල් කුමාර ඇල්ලට ඒ නම ලැබී ඇත්තේ මහාපරාක්‍රමබාහු නිරිඳු හා සම්බන්ධ පුවතක් නිසා යයි ජනප්‍රවාදයක් වෙයි. එම ජනකථාවෙන් කියැවෙන්නේ මහාපරාක්‍රමබාහු මහාරජතුමා කුමාර කාලයේ නාමල් බණ්ඩාර නමින් හැඳින්වුණු බවත් ඒ කාලයෙහි මේ දිය ඇල්ල හරහා විනෝදය පිණිස ඔබ මොබ පැනීම සිරිතක් ව පැවැති බවත්, ඒ හේතුවෙන් දිය ඇල්ල නාමල් කුමාර ඇල්ල නමින් ප්‍රසිද්ධ වූ බවත් ය. පරාක්‍රමබාහු රජතුමාගේ ජාත භූමිය වූ පිලගම පුංඛ ගමය පිහිටියේ මේ දිය ඇල්ල අවට පිහිටි දැනට ඝන වනයෙන් වැසී ගිය පිළගම්මන නම් පෙදෙසෙහි බවත් සමහරු කියති.
මහපැරකුම්බා මහ රජුගේ ශ්‍රේෂ්ඨ වාරිමාර්‍ග කර්මාන්තයක් වන ඇලිසර ඇල හැර ජල මාතිකාව ඇරඹෙන්නේ ද මේ පෙදෙස අසලින් ගලන අඹන් ගඟ හරහා බඳින ලද අමුණ නිසා ය.
(කර්තෘ: හපුගොඩ සුමනතිස්ස ස්ථවිර)
(සංස්කරණය නොකළ)
