අස්මාරා
ඊශානදිග අප්‍රිකාවේ පිහිටි එරිත්‍රියාවේ අගනුවරයි. මුහුදු මට්ටමේ සිට අඩි 7765ක් ඉහළින් හාමාසන් නම් සානුවෙහි පිහිටි මේ සනීප දායක නගරයෙහි සාමාන්‍ය උෂ්ණත්වය පැ. 65°කි. වර්ෂාපතනය අඟල් 20කි. 1890 දී එරිත්‍රියාව ජනපදයක් කොට ගත් ඉතාලි ජාතිකයන් එවකට එහි අගනුවර වූ මාසාවා නගරය අත්හැර 1900 දී මේ නගරය අගනුවර කරගත් හෙයින් එය අප්‍රිකානු නගරයකට වඩා ඉතාලි නගරයකට සමානව දියුණු වී ගියේය. ඉතාලි - ඉතියෝපියා සටනේ දී (1935 – 6) යුද්ධෝපකරණ එහාමෙහා ගෙනයාම සඳහා ඉතාලි ජාතිකයෝ රතු මුහුදුබඩ පිහිටි මාසාවා තොටෙහි සිට අස්මාරා දක්වා සැතපුම් 45ක් පමණ දිග දුම්රිය මාර්ගයක් තනා 'කේබල්' කම්බි ද සවි කළහ. දෙවැනි ලෝක සංග්‍රාම සමයේ දී බ්‍රිතාන්‍යයන් විසින් 1941 දී අල්ලා ගන්නා ලද එය බ්‍රිතාන්‍ය ඇමෙරිකන් මිත්‍ර හමුදාවන්ගේ කාර්මික මධ්‍යස්ථානයක් වූයෙන් එහි යන්ත්‍රෝපකරණ නිෂ්පාදනය සහ ආහාර ද්‍රව්‍ය නිෂ්පාදනය ආදි කර්මාන්ත දියුණු විය. 1956 දී 1,23,083ක් වූ මෙහි ජනගහනයෙන් 35%ක් පමණ ඉතාලි ජාතිකයෝය.
(සංස්කරණය: 1965)
[[ප්‍රවර්ගය:]]
[[ප්‍රවර්ගය:]]
