දේව ලංකාපුර
I වැනි පරාක්‍රමබාහු (ක්‍රි.ව. 1153-1186) රජුගේ සෙන්පතියෙකි. රජතුමා රුහුණු ප්‍රදේශයේ සතුරන් මැඩලීම සඳහා සටන් කළ අවධියේ දී හෙතෙම රක්ඛ ද්‍රවිඩාධිකාරීන් යටතේ හම්බන්තොට දිස්ත්‍රික්කයේ සේවය කළේ ය. ඔහු, ද්‍රවිඩාධිකාරීන්ගේ නියමය පරිදි හුරු බෑ දෙවි සෙනෙවියා සමඟ සටනට ගොස් ඔහු මරා සතුරු සේනාව පලවා හැරියේ ය.
ලංකාපුර සෙන්පති පාණ්ඩය දේශය ආක්‍රමණය කළ අවස්ථාවේ දී දේව ලංකාපුර ද සේනා මෙහෙයවීය. ලංකාපුර සෙන්පති යටතේ සිංහල හමුදාව සෙන්පොන්මාරි නුවර අල්ලා ගත් විට ද්‍රවිඩයෝ කල්ලර, මරවර ගෝලිහල, කුන්තවර, වල්ලක්කුට්ටාර, ඌචේන යන සේනාවලට හා අංචු කෝට්ටයන්ගේ සේනාවට අයත් හැට දහසක් පමණ, භට පිරිසක් රැගෙන අවුත් සිංහලයන්ගේ බලකොටුව වටලා ගත්හ. එවිට දේව ලංකාපුර හා සෝර ලංකාගිරි යන සෙනෙවියන් දෙදෙනා එක් දොරටුවකින් ද ගොකර්ණ දණ්ඩනායක, ලොක කේශධාතු යන දෙදෙන තවත් දොරටුවකින් ද කීර්ති කේශධාතු හා ජගද්විජය යන දෙදෙන තවත් දොරටුවකින් ද අවුත් එකවර සටන් කොට ද්‍රවිඩයන් විශාල සංඛ්‍යාවක් මරා සෙස්සන් පලවා හැරියහ.
පරාක්‍රමබාහු රජු ලංකාපුරට උදව් පිණිස ජගදිවිජය නම් සෙන්පතියකු යටතේ සේනාවක් යවන ලදි. ඔහු පත්තනල්ලුරුවට අවුත් සිංහ නම් නදිය අසලට වහා ම එන ලෙස ලංකාපුරට දන්වා යැවී ය. ඔහු විශාල හමුදාවක් රැගෙන වහා ම එහි ගියේ ය. ඒ අතර මඟ දී තිරුප්පාලුරු නම් ස්ථානයේ දී සිංහල සේනාව හා සතුරු සේනාව අතර මහත් සටනක් ඇති විය. දේව ලංකාපුර ප්‍රමුඛ අනික් සෙනෙවියෝ ද්‍රවිඩ සේනාව පලවා හැර තිරුප්පාලුරුව අල්ලා ගත්හ.
අනතුරුව කුලසේකර රජ නැවතත් විශාල හමුදාවක් රැස් කර ගෙන සිංහලයන් සමඟ සටනට පැමිණියේ ය. රාජිනා පුරයේ දී ඇති වුණු බිහිසුණු සටනකින් පසු ද්‍රවිඩයෝ කොටුව තුළට වී දොරවල් වසා ගත්හ.
ඉක්බිති දේව ලංකාපුර ද ගෝකර්ණ දණ්ඩනායක හා ලෝක කේශධාතු ද බටහිර දොරටුව වෙතට සේනා මෙහෙයවා කොටු බැම්ම හා දොරටුව බිඳ කොටුව තුළට වන්හ. රජු පලා ගියෙන් සිංහලයෝ රාජිනා පුරය අත්පත් කර ගත්හ.
(කර්තෘ: දේවිකා ප්‍රියදර්ශනී එදිරිවීර)
(සංස්කරණය නොකළ)
