දළුමුර පණිවුඩේ නිලධාරි
මේ රාජකාරිය රජුට කිරීම සඳහා සාමාන්‍යයෙන් නිලධාරීන් තිදෙනෙක් පමණ සිටියහ. ඉන් එක් අයෙකු නිතරම ආවතේව කිරීමට සූදානම්ව සිටිය යුතු විය. මේ අතර දිනකට දෙවරක් ඔවුන් නා පිරිසිදු වී සිටිය යුතු විය. ඔවුන්ට දිය ගෙන ඒම පිණිස තල්ලුව, පහල ගම්බඩ වැනි ගම්වර ඔවුන්ට දී ඇත.
දළුමුර හෙප්පුව නිසි ලෙස තබා ගැනීම ඔවුන් සතු ප්‍රධාන රාජකාරිය විය. මොවුන්ගේ ප්‍රධාන රාජකාරිය වන්නේ රජතුමාගේ අවශ්‍යතාවන්ට අනුකූල වන පරිදි රජු ඉල්ලූ විට හුණු, බුලත්, දුම්කොළ ආදිය රජු වෙත පිළිගැන්වීමත් එලෙසම රජුගේ අවශ්‍යතාවන් අනුව බේත්හේත් පිළියෙල කිරීමත් එවැනි ද්‍රව්‍ය රජතුමා විසින් ඉල්වූ අවස්ථාවන්හි දී එතුමා වෙත ගෙන ගොස් පිළිගැන්වීමත්, පිළියෙල කිරීමත් ය.
මේ තනතුර සඳහා බොහෝ විට කන්ද උඩරට මහනුවර උසස් පවුල්වලින් පැවත එන කුලවත් වයස 24 දක්වා වන තරුණයන් බඳවා ගෙන ඇත්තේ ය.
පණිවිඩ කරන රාළ යයි රජු කථා කළ විට හේ මුඛවාඩම් බැඳ දළුමුර හෙප්පුව තම වම් අතේ සළු කීපයක් මත තබා ගන රජු ඉල්ලන දේවල් දකුණු අතින් දීම ඔහුගේ චාරිත්‍රයයි. මේ කාලය තුළ ඔහු සිටගෙන සිටිය යුතු වේ. රජු ගමනක් යන විට ද ඒ සමඟ මොවුහු යති.
(කර්තෘ: ජී.එච්. ආරියසේන: 1993)
(සංස්කරණය නොකළ)
